“S&P Global Ratings” Azərbaycanın xarici və yerli valyutada uzunmüddətli və qısamüddətli suveren kredit reytinqlərini "BB+/B" səviyyəsində təsdiqləyib. Reytinq üzrə proqnoz isə sabit olaraq qiymətləndirilib.
Neft hasilatının azalmasına baxmayaraq sabitlik gözlənilir
Fins.az-ın məlumatına görə, agentlik Azərbaycanın əhəmiyyətli fiskal və xarici ehtiyatlarının ticarət şərtlərinin dəyişməsi ilə bağlı mümkün şoklara qarşı iqtisadiyyatı qorumağa kömək edəcəyini proqnozlaşdırır. Bununla belə, fiskal balansın gözləntilərdən zəif olması və neft hasilatının daha sürətlə azalması reytinqlərin aşağı salınmasına səbəb ola bilər.
Eyni zamanda, agentlik qeyd edir ki, Azərbaycan büdcə və cari hesab profisitini qorumağa davam etsə və geosiyasi risklər azalsa, reytinqlər yüksələ bilər.
Dövlət Neft Fondu və iqtisadi artım
Azərbaycan Dövlət Neft Fondunun (SOFAZ) likvid aktivlərinin ÜDM-in 80%-nə çatacağı proqnozlaşdırılır. Eyni zamanda, dövlət borcunun 2024-cü ilin sonuna ÜDM-in 13%-i səviyyəsində qalacağı gözlənilir.
2024-cü ildə iqtisadi artım əsasən qeyri-neft sektorundakı, xüsusilə nəqliyyat və tikinti sahələrindəki aktivliyə görə 4,5%-ə yüksəlib. 2026-cı ilə qədər büdcə və cari hesab profisitlərinin davam edəcəyi, 2027-ci ildən isə balans səviyyəsinə keçəcəyi qeyd olunur.
Manatın sabitliyi
Agentlik bildirir ki, Azərbaycan manatının ABŞ dollarına bağlılığı davam edəcək və bu, pul-kredit siyasətində sabitliyi təmin edəcək.
Azərbaycan iqtisadiyyatı tədricən şaxələndirilməyə və geosiyasi təsirlərdən müdafiəyə yönəlmiş siyasətini davam etdirir. Reytinqlərin sabit saxlanılması ölkənin makroiqtisadi sabitliyinin qorunmasına yönəlik səylərinin təsdiqidir.
Fuad Mədətov
Fins.az
