Səfirliklərdə maliyyə maxinasiyalarının qarşısı belə alınacaq
“Diplomatik xidmət haqqında” yeni qanun layihəsinin Milli Məclisin komitələrində müzakirəsi baş tutub. Xarici İşlər Nazirliyinin Hüquqi təminat idarəsinin rəisi Hüseyn Hüseynov “Diplomatik xidmət haqqında” yeni qanun layihəsinin hazırlanmasının səbəbini açıqlayıb. Onun sözlərinə görə, “Diplomatik xidmət haqqında” Qanunun qəbulundan ötən dövr ərzində dövlət qulluğu ilə bağlı qanunvericiliyə xeyli dəyişiklik edilib, eyni zamanda dövlət qulluğunun xüsusi qolu olan diplomatik xidmət sahəsi xeyli genişlənib.
Hüseyn Hüseynov bildirib ki, bəzi hallarda elə məsələlər olur ki, onun heç bir normativ hüquqi aktla tənzimlənməsi mümkün olmur: “Buna görə də yeni "Diplomatik xidmət haqqında" qanun layihəsi hazırlanıb".
Qeyd edək ki, diplomatik xidmət orqanlarında vəzifələrin yeni təsnifatı müəyyənləşib, belə ki, diplomatik nümayəndəlikdə maliyyə məsələləri üzrə attaşe olacaq. Bu, yeni qanun layihəsində əksini tapıb.
Qeyd edək ki, mətbuatda Hesablama Palatası və Maliyyə Nazirliyinin Azərbaycanın müxtəlif səfirliklərində yoxlama apardığı haqda zaman-zaman informasiyalar yayılır. Dövlət Təhlükəsizlik Xidməti iki il əvvəl Xarici İşlər Nazirliyində bir neçə diplomatik idarə rəhbərini korrupsiya ittihamı ilə həbs də etmişdi. Yeni qanunda bu baxımdan diplomatik nümayəndəlikdə maliyyə məsələləri üzrə attaşe olması zərurəti meydana gəlib. Bəs maliyyə məsələləri ilə bağlı attaşe vəzifəsinin yaradılmasında məqsəd nədir?
Arzuxan Əlizadə
Milli Məclisin deputatı Arzuxan Əlizadə “Yeni Müsavat”a bildirdi ki, “Diplomatik xidmət haqqında” qanun layihəsi özündə bir sıra məsələləri ehtiva etdiyi səbəbilə, həmçinin Vergilər Məcəlləsində və Əmək Məcəlləsində, bir sıra digər qanunlarda müvafiq dəyişikliklər, əlavələr edilməsi də nəzərdə tutulub. İlkin olaraq qanun layihəsinin 5 fəsil 31 maddədən ibarət olduğu ilə bağlı məlumat var: “Bu qanun layihəsi beynəlxalq təcrübəyə əsaslanaraq hazırlanıb və daha çox diplomatik xidmət orqanları əməkdaşlarının xidmət keçdiyi müddət ərzində onların statusunu, eyni zamanda onların ailə üzvlərinin də statusunu müəyyənləşdirən qanun layihəsidir. Maliyyə məsələləri üzrə attaşe də qanun layihəsində vacib yeniliklərdəndir. Gələcəkdə müsbət nəticələri olacaq. Kifayət qədər mütərəqqi qanun layihəsidir. Komitə iclaslarında müzakirələrdən sonra parlamentin plenar iclasına çıxarılacaq və yəqin ki, qəbul ediləcək”.
Çingiz Qənizadə
Demokratiya və İnsan Hüquqları Komitəsinin sədri, hüquq üzrə fəlsəfə doktoru Çingiz Qənizadə “Yeni Müsavat”a bildirdi ki, digər sahələri əhatə edən qanunlar kimi, “Diplomatik xidmət haqqında” Qanunun da zaman keçdikcə yenilənməsi, əlavələrin, dəyişikliklərin edilməsi təbiidir və vacibdir: "Qanunda diplomatik nümayəndəliklərdə maliyyə məsələləri üzrə attaşe vəzifəsinin nəzərdə tutulması düzgün addımdır. Qanun layihəsi beynəlxalq təcrübəyə əsaslanaraq hazırlanıb. Hesabatlılıq, maliyyə məsələlərində şəffaflıq, dəqiqlik baxımından qanunda belə bir yeniliyin edilməsinin effekti olacaq. Hesab edirəm ki, maliyyə məsələləri üzrə attaşe vəzifəsinin təsis edilməsində əsas məqsədlərdən biri də məhz qeyd etdiklərimizdir. Son illərdə bəzi səfirliklərimizdə maliyyə məsələləri ilə bağlı pozuntulara yol verildiyi barədə rəsmi açıqlamalar olub. Müvafiq qurumların araşdırma apardıqları, hətta maliyyə pozuntuları ilə bağlı cinayət işləri də açılıb. İstisna deyil ki, maliyyə məsələləri üzrə attaşe məsələsinin reallaşdırılmasını həm də bu məsələlər zərurətə çevirib. Eyni zamanda maliyyə attaşesi diplomatik nümayəndəliklərimizin təmsil olunduqları ölkələrlə iqtisadi, ticarət əlaqələrinin də qurulmasında effektiv ola bilər”.
Etibar SEYİDAĞA,
“Yeni Müsavat”
