Bakı, TurkicWorld
Azərbaycan və Serbiya birbaşa aviareyslərin açılması istiqamətində səyləri gücləndirir.
TurkicWorld xəbər verir ki, bunu Serbiyanın xarici işlər naziri Marko Curiç Belqradda Azərbaycanın xarici işlər naziri Ceyhun Bayramov ilə birgə mətbuat konfransında deyib.
"Xüsusilə qeyd etmək istəyirəm ki, biz turizm sektorunun inkişafını müzakirə edirik. Bu istiqamətdə birbaşa uçuşların açılması istiqamətində işləri gücləndiririk", - o bildirib.
Curiç qeyd edib ki, Serbiyanın enerji sahəsində iqtisadi əməkdaşlığı və qarşılıqlı fəaliyyətini inkişaf etdirmək üçün Azərbaycanla fəal işləyir, bunun sayəsində qlobal miqyasda qeyri-sabit olan bu dövrdə Serbiyanın enerji təhlükəsizliyi əhəmiyyətli dərəcədə artıb.
"Ölkələrimiz arasındakı dostluq, digər aspektlərlə yanaşı, Prezident Aleksandr Vuçiçlə Prezident İlham Əliyev arasındakı möhtəşəm şəxsi münasibətlərə əsaslanır. Əminliklə deyə bilərəm ki, 2024-cü il Serbiya ilə Azərbaycan arasında əməkdaşlıq üçün həqiqətən də əlamətdar il oldu", - o bildirib.
Daha sonra M.Curiç ətraf mühitlə bağlı məsələlərin həllinə mühüm töhfə verən COP29 konfransının uğurlu təşkilinə görə Azərbaycanı təbrik edib.
Nazir, Serbiya ilə Azərbaycan arasında əməkdaşlığın yaxın gələcəkdə daha da sıx və intensiv xarakter alacağına əminliyini ifadə edib.
"2025-ci ildə biz strateji dialoqu yüksək siyasi səviyyədə davam etdirəcəyik və biz Belqradda Serbiya ilə Azərbaycan arasında strateji əməkdaşlıq şurasının növbəti iclasına ev sahibliyi etməyi səbirsizliklə gözləyirik", - nazir əlavə edib.
