Məlum olduğu kimi, 2024-cü il yanvarın 1-dən əmanətlərə iki halda vergi güzəşti tətbiq olunur.
Vergi Məcəlləsinə edilən dəyişikliyə görə, fiziki şəxslərin hər bir bankda milli valyutada olan əmanətlər üzrə hesablanan aylıq faiz gəlirlərinin 200 manatadək olan hissəsi gəlir vergisindən azad edilib.
Eyni zamanda, fiziki şəxslərin hər bir bankda milli valyutada olan depoziti 18 ay və daha artıq müddətə yerləşdirildikdə və depozitin məbləği 18 aydan tez olmayaraq ödənildikdə hesablanan faiz gəlirlərinin tam hissəsi 3 il müddətinə gəlir vergisindən azad edilib.
Lakin bir neçə vətəndaş saytımıza müraciət edərək onlara məxsus depozitlərdən əldə olunan faizdən vergi çıxıldığını iddia edir. Onların bildirdiyinə görə, məsələ ilə əlaqədar depozit qoyduqları banka müraciət etdikdə Mərkəzi Bank tərəfindən bununla bağlı hər hansı məktubun daxil olmadığı deyilir.
Şikayətlə bağlı Mərkəzi Banka müraciət etdik. Sorğumuza belə cavab aldıq: “Banklar haqqında” Qanuna əsasən banklar cari fəaliyyətini qanunvericiliklə müəyyən edilmiş tələblərə müvafiq surətdə həyata keçirməlidirlər. Məlumunuz olduğu kimi, Vergi Məcəlləsinə müvafiq dəyişikliklər 2024-cü ilin yanvar ayının 1-dən qüvvəyə minib. Buna müvafiq olaraq banklar həmin tarixdən etibarən fiziki şəxslərin əmanətləri üzrə faiz gəlirlərinin vergiyə cəlb olunmasını Məcəlləyə uyğun həyata keçirməlidirlər”.
Vergi Məcəlləsinə əsasən, 2016-cı il fevralın 1-dən etibarən 7 il müddətində yerli bank və xarici bankın Azərbaycandakı filialı tərəfindən fiziki şəxslərin əmanətləri üzrə ödənilən illik faiz gəlirləri gəlir vergisindən azad olub və qeyd edilən bu müddət 2023-cü il 1 fevral tarixində bitib.
Həmin tarixdən etibarən əmanətlər üzrə faiz gəlirlərindən banklar tərəfindən ödəmə mənbəyində 10 faiz dərəcə ilə verginin tutulması həyata keçirilir.
Qanuna əsasən, fiziki şəxslərin əmanətləri üzrə faiz gəlirlərinin onlara məxsus olan kapital gəlirləri olması nəzərə alınmaqla, faiz gəlirlərinin milli və ya xarici valyutada olmasından asılı olmayaraq, banklar tərəfindən ödəmə mənbəyində 10 faiz dərəcə ilə vergi tutulurdu. Bu ildən isə sözügedən gəlirlərə yuxarıda qeyd etdiyimiz güzəştlər tətbiq olunur.
