La-Manş boğazında immiqrantları daşıyan qayığın batması nəticəsində 12 nəfər həyatını itirib. Hadisə bu il bölgədə ən böyük insan itkisi kimi qeydə alınıb.
İngiltərəyə getmək istəyən mühacirləri daşıyan qayığın Fransa sahillərində Manş boğazında batması nəticəsində altı uşaq və bir hamilə qadın olmaqla 12 nəfər həyatını itirib.
Fransa Sahil Mühafizəsi Boulon-sur-Mer yaxınlığında baş verən insidentdə 50-dən çox insanın xilas edildiyini, iki nəfərin isə ağır vəziyyətdə olduğunu bildirib. Səlahiyyətlilər qayığın həddindən artıq yükləndiyini və dibinin zədələndiyini açıqlayıb. Qayıqda yalnız bir neçə nəfərin xilasedici jilet geyindiyi bildirilib.
Bu faciə bu il La-Manş kanalında ən böyük insan itkisi kimi qeydə alınıb. Hadisədə suriyalı insan alverçisinin əli olduğu ehtimal edilir. Prokuror Guirec Le Bras, qurbanların əksəriyyətinin Eritreya mənşəli olduğunu təxmin etdiklərini, lakin onların dəqiq vətəndaşlıqlarının hələ müəyyən edilmədiyini söylədi.
Fransanın daxili işlər naziri Gerald Darmanin bildirib ki, Fransa səlahiyyətliləri kiçik qayıqların 60 faizini dənizə çıxmazdan əvvəl dayandırıb. Bununla belə, o, insan qaçaqmalçılarının daha çox insanı qayıqlara mindirdiyini və bunun ölümlə nəticələnən qəzalara səbəb olduğunu vurğulayıb. Darmanin Böyük Britaniya və Avropa İttifaqını immiqrasiya mövzusunda razılığa gəlməyə çağırıb.
Böyük Britaniyanın daxili işlər naziri İvette Kuper hadisənin böyük faciə olduğunu və insan tacirlərinin getdikcə daha çox insanı təhlükəli qayıqlarla dənizə göndərdiyini bildirib.
Fransa sahil mühafizəsi xilasetmə əməliyyatında helikopter, donanma gəmiləri və balıqçı qayıqlarından istifadə edib. Kiçik qayıqlarla Manş boğazını keçməyə çalışan miqrantların sayı artmaqda davam edir. 2018-ci ildən bəri bu yolla 135 mindən çox insan Böyük Britaniyaya çatıb, bu il isə 21 mindən çox insan dənizi keçib.
Böyük Britaniyanın baş naziri Keir Starmer əvvəlki hökumətin Ruandaya qaçqın göndərmək planını ləğv etdiyini və insan alverinə qarşı mübarizə aparacaqlarını bəyan edib. Lakin tənqidçilər sığınacaq axtaranlar üçün daha təhlükəsiz marşrutların yaradılmalı olduğunu iddia edirlər. Böyük Britaniyada fəaliyyət göstərən Amnesty International təşkilatı bu faciələri dayandırmaq üçün təkcə insan alverinə qarşı ritorikanın kifayət etməyəcəyini vurğulayıb.
