“Özümü çox yaxşı hiss edirəm”.
Modern.az xəbər verir ki, bu sözləri “Qoliat" ekspedisiyasını Xəzər dənizində davam etdirmək qərarına gələn tanınmış səyyah Karl Buşbi Qazaxıstandan Azərbaycana Xəzər dənizini üzərək gəlməsi barədə jurnalistlərə açıqlamasında deyib.
O, səyahətin olduqca çətin keçdiyini bildirib: "Xoşbəxtlikdən hər hansısa çətinliklə və ya problemlə qarşılaşmadıq. Bəxtimiz gətirdi ki, hava möhtəşəm idi. Üzməyimizə heç nə mane olmadı".
Gənclər və İdman Nazirliyinin və Bakı Şəhər Halqası Əməliyyat Şirkətinin dəstəyi və təşkilatçılığı ilə keçirilən dəniz səyahəti Qazaxıstanın Aktau şəhəri yaxınlığındakı sahildən başlayıb. Hər iki səyyah Azərbaycana çatmaq üçün 41 gün ərzində 288 kilometr məsafə qət edib.
Səyahət zamanı onlarla iki gənc idmançımız - 15 qat respublika çempionları Anastasiya Boborkina və Əbdürrəhman Rüstəmov da birgə üzüblər.
Britaniyalı Karl Buşbi və amerikalı Anjela Maksvel dünyanın dörd tərəfini kəşf etməkdə olan tanınmış iki macəraçıdır. Karl Buşbi bu missiyaya hələ 1998-ci ilin noyabrında 38 min kilometrlik məsafəni qət etməklə başlayıb. Həmkarı Anjela Maksvel son 7 il ərzində 4 qitədə - 14 ölkədə olub, susuz səhraları, qarlı dağları gəzərək ümumilikdə 32 min 186 kilometr məsafə qət edib.
