Livanda rabitə vasitələri növbəti dəfə yenidən partlayıb!

     Livanda əvvəlki gün baş verən peycer cihazlarındakı partlayışların bir bənzəri bu dəfə ölkə üzrə müşahidə edilib. Livanın paytaxtı Beyrutun cənubundakı məhəllələrdə Hizbullah döyüşçülərinin istifadə etdiyi əl radiosetlərinin çərşənbə günü günorta partladığı bildirilib. Keçən gün isə Hizbullah döyüşçüləri tərəfindən istifadə edilən rabitə cihazları partlamışdı. Çərşənbə axşamı Livanda peycer cihazları naməlum səbəbdən partlayıb. Hadisə nəticəsində 12 nəfərin öldüyü, 3000 nəfərin isə yaralandığı bildirilib. Bu partlayışlardan sonra ölkənin cənubunda nüfuz sahibi olan Hizbullah, İsrailin “kiber hücum” təşkil etdiyini iddia etmişdi.     Bildirilib ki, bu yaxınlarda Beyrutun cənub məhəllələrində və bütün ölkədə oxşar partlayışlar eşidilib. Hizbullaha bağlı olan El Menar televiziyası, Livanın bir çox bölgəsində partlayışların olduğunu və partlayışların radioların partlaması nəticəsində baş verdiyini bildirib. Son partlayışların nəticələri hələ dəqiqləşməyib. Digər tərəfdən, bir amerikalı rəsmisi, İsrailin peycer cihazlarında saxlanılan kiçik miqdarda partlayıcının partladıldığı hücumdan sonra Amerika Birləşmiş Ştatlarına məlumat verdiyini bildirib. Peycer cihazlarında markasının istifadəsinə icazə verən Tayvanın Gold Apollo şirkətinin verdiyi açıqlamaya görə, çərşənbə axşamı günü edilən hücumda istifadə edilən AR-924 peycerləri, Macarıstanın paytaxtı Budapeştdə BAC Consulting KFT tərəfindən istehsal edilib.     Livandakı hücum, çərşənbə axşamı günorta peycer cihazlarının sahiblərinin əlində və ya ciblərində istiləşməyə başlaması və ardınca partlaması ilə başlayıb. Hücuma məruz qalanların əksəriyyətinin Hizbullah üzvləri və ya ona bağlı döyüşçülər və ya mülki şəxslər olduğu bildirilir. "Dayanıqlı" olaraq təqdim edilən AR-924 peycer cihazı, hücumdan sonra aradan qaldırılmamışdan əvvəl Gold Apollo-nun veb saytında elan edilən xüsusiyyətlərə əsasən, şarj oluna bilən lityum batareya ilə təchiz edilmişdir. Batareyasının ömrünün isə 85 günə qədər olduğu iddia edilirdi. İllərdir davam edən iqtisadi böhrandan sonra elektrik kəsintilərinin tez-tez yaşandığı Livanda bu, çox önəmlidir. Peycer cihazları, mobil telefonlardan fərqli bir simsiz şəbəkədə işləyərək təcili hallarda daha dayanıqlı olmasını təmin edir.     Hizbullah üçün peycerlər, həm də İsrailin Livanın mobil telefon şəbəkələrinə intensiv elektron nəzarətindən yan keçməyin bir yoludur. Mütəxəssislər, İsrailin bu qurğulara daxil olduğunu və Hizbullaha təhvil verilməzdən əvvəl onların içərisinə kiçik bir partlayıcı yerləşdirdiyini irəli sürür. Çünki cihazın içindəki batareyanın belə ölümcül partlayışlara səbəb olması mümkün hesab edilmir. Reuters xəbər agentliyinə danışan yüksək səviyyəli bir Livanlı təhlükəsizlik mənbəsi, İsrailin Mossad kəşfiyyat təşkilatının aylar əvvəl Livanlı Hizbullah qrupu tərəfindən idxal edilən 5.000 peycer cihazının içinə partlayıcı maddə yerləşdirdiyini iddia edir.