9-cu turun “Kəpəz” – “Neftçi” matçı futbol üzrə Azərbaycan Premyer Liqasında 2024/2025-ci illər mövsümünün ən məhsuldar oyunu olub.
Arena.az xəbər verir ki, meydan sahiblərinin 4:3 hesabı ilə qalib gəldikləri görüşdə qapılara ümumilikdə 7 qol vurulub.
Bunadək ən məhsuldar matçda 6 top qeydə alınıb. 7-ci turun “Səbail” – “Sabah” görüşündə qonaqlar qalib gəliblər – 4:2.
Bununla da “Neftçi” çempionatdakı qələbəsizlik seriyasını 10-a çatdırıb. Ötən mövsümün son turunda “Sabah”a 0:1 hesabı ilə uduzan “ağ-qaralar” cari çempionatın 9 görüşündə 5 heç-heçə ediblər və 4 dəfə məğlub olublar.
Mayın 18-də “Səbail” üzərində 3:0 hesablı qələbədən sonrakı ardıcıl 10 qalibiyyətsizlik “Neftçi”nin tarixində yeni antirekorddur. Bakı klubu 2015-ci ildəki 9 matçlıq seriyanı “arxada qoyub”. 2014/2015 və 2015/2016 mövsümlərini əhatə edən həmin seriya müddətində 5 heç-heçə və 4 məğlubiyyət yaşanıb.
“Neftçi” həm də tarixində ilk dəfə 3 və daha çox qol vurduğu görüşdə uduzub. Ölkə çempionatları tarixində isə 28-ci belə hadisə yaşanıb.
