Macarıstan hökuməti tezliklə ölkə sakinlərinin bəzilərinin vergi daxilolmalarından gəlir əldə edəcəkləri ilə bağlı iddialı proqrama başlayacağını elan edib. Bununla da Mərkəzi Avropa ölkəsi sakinlərinin aylıq bir milyon forintdən bir qədər çox (1 avro = 401 forint) ödəmə hüququna malik olacağı gözlənilir.
AZƏRTAC xəbər verir ki, bu məsələ hələ hökumət tərəfindən proqramın rəsmən elan edilməsindən əvvəl Macarıstan mətbuatında gündəmə gəlib. Bu gün M1 telekanalında çıxış edən İqtisadiyyat və İnkişaf İnstitutunun eksperti Altal Nadın sözlərinə görə, xeyli vaxtdır ki, hökumətin planları vergi sistemini təkmilləşdirməkdən ibarətdir. Təbii ki, bu, dövlətin mövcudluğunun əsas amili olan vergiləri tamamilə ləğv etmək məqsədi daşımır, lakin ölkə sakinləri də onlardan öz paylarını ala biləcəklər. Müxbirin bunun dövlət təzminatı olması ilə bağlı sualını cavablandıran verilişin qonağı müsbət cavab verib. O əlavə edib ki, hökumət adambaşına aylıq 1 065 000 forint ödəniş ayırıb. “Bəziləri üçün bu məbləğ az olacaq. Amma əksər insanlar üçün vergilərin daha çox kompensasiya edilməsi deməkdir”, - deyə ekspert bildirib.
Dövlətin bu cür kompensasiya üçün pulu haradan alacağı ilə bağlı suala cavab verən A.Nad deyib: “Vergiödəyicilərinin pulları ölkə büdcəsinə daxil olandan sonra həmin vəsaitin bir hissəsi dövlət ehtiyaclarına: sosial işçilərin maaşlarına, sosial proqramların maliyyələşdirilməsinə, müdafiə sisteminin dəstəklənməsinə və digər sahələrə yönəldilir. Bununla belə, vergilərin bir hissəsi toxunulmaz olaraq qalır. Bu pul əlavə gəlir əldə etmək üçün yatırılır. İndi də xəzinə vergi ödəyicilərinə kompensasiya verəcək”.
Eyni zamanda, qeyd etmək lazımdır ki, bu proqramdan bütün vətəndaşlar deyil, ildə cəmi 4000 nəfər, üstəlik, son 10 il ərzində işləməyə davam edənlər (təbii ki, vergi ödəyənlər) yararlana biləcəklər.
Qərarın təfərrüatlarına gəlincə, onlar bu yaxınlarda açıqlanacaq.
