2023-cü ildə dünyada 10,3 milyon insan qızılca xəstəliyinə yoluxub. Bu barədə Ümumdünya Səhiyyə Təşkilatı (ÜST) ilə ABŞ-nın Xəstəliklərə Nəzarət və Qarşısının Alınması Mərkəzinin (CDC) birgə məlumatında qeyd olunub.
Reyting.az birgə məlumata əsasən bildirir ki, 2022-ci ilə nisbətən 100-də 20 artım var.
Dünyada qızılca xəstəliyinin artmasının səbəbi peyvəndin qeyri-kafi olmasıdır. Peyvəndlə bağlı qlobal boşluqlara görə, 2023-cü ildə 57 ölkədə böyük və dağıdıcı qızılca epidemiyaları baş verib.
Amerika qitəsindən başqa bütün bölgələrin epidemiyadan təsirləndiyi, böyük və dağıdıcı epidemiyaların yarısının isə Afrikada qeydə alındığı bildirilir.
Qızılcanın dünyada ən yoluxucu xəstəliklərdən biri olduğunu deyən mütəxəssislərin sözlərinə görə, epidemiyaların qarşısını almaq üçün qızılca/məxmərək peyvəndinin ən azı 95 faizində iki doza vurulmalıdır. Bununla belə, 2023-cü ildə bütün dünyada uşaqların yalnız 83 faizi qızılca peyvəndinin ilk dozasını alıb. Bu, 2022-ci illə eyni səviyyədir, lakin pandemiyadan əvvəlki 86 faizdən aşağıdır. Ötən il bu uşaqların yalnız 74 faizi peyvəndin ikinci dozasını alıb. Peyvəndlə qarşısı alına bilən bu xəstəlikdən hələ də çoxlu uşaq ölür. Xüsusilə Afrika, Şərqi Aralıq dənizi və münaqişədən təsirlənən bölgələrdə qızılcaya qarşı iki doza peyvənd uşaqlara çatdırılmalıdır. Bunun üçün toxunulmazlıq kampaniyaları aparılmalıdır.
ÜST rəsmiləri qızılcanın 2030-cu ilə qədər epidemiya təhlükəsi kimi aradan qaldırılması məqsədinin “təhlükə altında” olduğu barədə xəbərdarlıq edib.
Ötən il 82 ölkə qızılca xəstəliyini aradan qaldıra bilib. Afrikadan başqa hər bölgədə xəstəliyi aradan qaldıran ən azı bir ölkə var. Səpki, qızdırma və qripə bənzər simptomları olan uşaqlarda ciddi fəsadlar yarada bilən qızılca virusunun 2023-cü ildə əksəriyyəti 5 yaşdan kiçik olan 107.500 nəfərin ölümünə səbəb olduğu təxmin edilir.
V. QULİYEV
