Bakıda keçirilmiş BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası (COP29) çərçivəsində qatarlarla ümumilikdə 10 mindən çox akkreditasiyalı sərnişin daşınıb.
“İki sahil” xəbər verir ki, bu barədə Azərbaycan Dəmiryol Muzeyində COP29 günlərində fəaliyyət göstərmiş COP29 və ADY könüllüləri ilə görüşdə bildirilib.
Qeyd edilib ki, Azərbaycan Dəmiryol Muzeyi də bu dövrdə fəaliyyətini gücləndirib. COP29 tədbirlərində iştirak etmək üçün Bakıya gələn Çin, Almaniya, İsveçrə, Böyük Britaniya, Braziliya, İrlandiya kimi ölkələrin vətəndaşları muzeyi ziyarət ediblər.
ADY rəhbərliyinin iştirak etdiyi görüşdə ölkənin dünya əhəmiyyətli daha bir tədbirə uğurla ev sahibliyi etdiyi və bu prosesdə könüllülərin böyük əməyi olduğu diqqətə çatdırılıb.
Könüllülərin planetin gələcəyi naminə qlobal dialoqu dəstəkləmək məqsədilə fədakarcasına çalışaraq hər kəsi ruhlandırdığı, COP29-u hər kəs üçün əlçatan etdiyi vurğulanıb.
Qeyd olunub ki, COP29 və ADY könüllüləri noyabrın 11-23-də Abşeron dairəvi marşrutu üzrə stansiya və dayanacaqlarda akkreditasiyalı şəxslərin rahat keçidinə kömək etməklə, onları qatarların hərəkət cədvəli ilə tanış etmək və istiqamətləndirməklə tədbirin uğurla keçməsinə töhfə veriblər.
Sonda ADY adından könüllülərə xatirə hədiyyələri və təşəkkürnamə təqdim edilib.
