Fins.az - Dünya bazarında qəhvə qiymətləri rekord səviyyəyə çatıb.
Arabica növü qəhvənin qiyməti Nyu-York birjasında funt üçün 3 ABŞ dollarına yüksələrək, son 13 ilin ən yüksək göstəricisini təkrarlayıb. Mütəxəssislər bu artımı əsasən Braziliyada baş verən quraqlıqla əlaqələndirirlər.
Braziliyada məhsul itkisi gözlənilir
Dünyanın ən böyük qəhvə istehsalçısı olan Braziliyada mövcud iqlim şəraiti məhsul potensialına ciddi təsir edib. Trading Economics-in məlumatına görə, arabica qəhvəsinin istehsalı cari mövsümdə nəzərəçarpacaq dərəcədə azalıb. Son günlərdə yağan yağışlara baxmayaraq, torpağın nəmlilik səviyyəsi hələ də lazımi səviyyəyə çatmayıb. Bu vəziyyət təkcə cari mövsümə deyil, həm də gələn ilki məhsula mənfi təsir göstərə bilər.
İstehsal proqnozları pessimistdir
StoneX konsaltinq şirkətinin proqnozlarına görə, 2025/26 mövsümündə Braziliyada qəhvə istehsalı 60 kq-lıq 65,6 milyon kisəyə qədər azalacaq ki, bu da əvvəlki dövrlə müqayisədə 0,4% azalma deməkdir. Arabica qəhvəsinin illik istehsalının isə 10,5% azalaraq 40 milyon kisəyə enəcəyi gözlənilir.
Qlobal ixrac artıb, tələbat yüksəkdir
2023/24 mövsümündə dünya üzrə qəhvə ixracı 12% artıb. Bu isə qəhvəyə olan qlobal tələbatın davamlı olduğunu göstərir. Soyuq havaların başlanması ilə birlikdə, xüsusilə Rusiyada “təkliflə aparılma” qəhvə satışlarında nəzərəçarpacaq artım qeydə alınıb.
İqlim dəyişikliyi və istehsaldakı azalma qəhvə bazarında qiymət artımlarını daha da dərinləşdirə bilər. Mütəxəssislər yaxın aylarda qiymətlərin sabitləşməsinin çətin olduğunu bildirirlər.
