Qardaşlıq və dostluq münasibətləri strateji müttəfiqlik zəminində inkişaf edir
24 illik Bəşər Əsəd rejiminin devrilməsi ilə Suriya yeni tarixi dönəmə qədəm qoyur. Ötən illər ərzində ölkədə baş verən hadisələr, sosial-siyasi, hərbi gərginliklər istər əhali arasında, istərsə də ordu daxilində böyük narazılıqlar formalaşdırmışdı. Xalq açıq şəkildə öz etiraz səsini ucaldır, Əsəd rejiminin apardığı siyasətə “yox” deyirdi. Ard-arda baş verən vətəndaş müharibələri, qarşıdurmalar isə hakimiyyət üçün dərs olmadı - ötən dövrdə müharibədə yaranan müvəqqəti sükutdan milli birlik, milli barışıq üçün istifadə olunmadı. Tam əksinə, Əsəd rejimi qeyri-konstruktiv və aqressiv hərəkətlərini davam etdirdi. Nəticə etibarı ilə, aqibəti əvvəldən bəlli olan Əsəd hakimiyyəti özünün məntiqi sonunu gətirdi.
Terrorizmə qarşı mübarizə...
Bu gün artıq yeni siyasi dövr formalaşır. Suriyada baş verən hadisələr əsl reallığı ortaya qoyur - xalqına güvənməyən, xalqının etimadını doğrultmayan, yalnız özünün hakimiyyətini qorumağa yönəlik fəaliyyətlə yadda qalan Bəşər Əsəd ölkənin gələcəyini sual altına qoymuşdu. Amma artıq vəziyyət dəyişib. Artıq yeni hədəflər uğrunda müzakirələr aparılır, addımlar atılır. Bu gün Suriyada milli birlik hökumətinin yaradılmasına böyük ehtiyac var və bu amil Suriyanın ərazi bütövlüyünün saxlanması üçün vacib şərtlərdən biridir. Bölgənin aparıcı aktoru kimi Türkiyə problemlərin həllində mühüm rol oynayır. Uzun illərdir ki, Suriyadakı müharibələrdən mühacirət etmək məcburiyyətində qalmış əhaliyə sığınacaq və pənah yeri olan Türkiyə bu gün vəziyyətin stabilləşməsi üçün önəmli işlər görür. Ankara hərbi qarşıdurma başlanan dövrdən mülki vətəndaşlarla bağlı öz narahatlığını ifadə etmiş, humanitar yardım məsələsində bir daha önə çıxmışdı. Bölgədə terrorizmin sona yetməsi üçün Türkiyə bütün gücünü səfərbər etdi - məhz Türkiyənin dəstəyi ilə Suriyanın ərazisində terrorizmə qarşı mübarizə daha da qəti hal almağa başladı. Artıq yeni siyasi reallıqlarda Türkiyə özünün yeni dəstək imkanlarını təqdim edir. Qarşıdan gələn dövrdə Suriyada proseslərin dinc inkişafı üçün Türkiyə yenidən töhfələr verməyə hazır olduğunu bildirir.
Bakı Ankara ilə birlikdə...
Xüsusi vurğulamaq lazımdır ki, Türkiyə ilə rəsmi müttəfiqlik bəyannaməsi - “Şuşa Bəyannaməsi”ni imzalayan Azərbaycan da uzun illər terrordan əziyyət çəkib. Bununla belə, Azərbaycan hər zaman qlobal məkanda terrorizmə qarşı mübarizənin ön sırasında yer alıb, bu kimi tədbirləri dəstəkləyib. Suriyada cərəyan edən hadisələrlə bağlı da Azərbaycanın mövqeyi açıq və aydındır - qardaş Türkiyənin yaxın dəstəyi ilə Suriyada sabitlik dövrünün başlayacağına böyük ümidlər bəslənilir. Yeri gəlmişkən, dekabrın 10-da Azərbaycan Prezidenti İlham Əliyev Türkiyə Respublikasının Prezidenti Rəcəb Tayyib Ərdoğana zəng edib. Söhbət zamanı dövlət başçıları Azərbaycan ilə Türkiyə arasında qardaşlıq və dostluq münasibətlərinin strateji müttəfiqlik zəminində inkişaf etdiyini bir daha vurğulayıblar. Telefon danışığı əsnasında Cənubi Qafqaz və Yaxın Şərq regionuna aid məsələlərə toxunulub, xüsusilə Suriyada Əsəd rejiminin çökməsindən sonra yaranmış vəziyyət müzakirə olunub. Dövlət başçıları bu münasibətlə Suriya xalqına təbriklərini, Suriya dövlətinin ərazi bütövlüyünə və suverenliyinə dəstəklərini ifadə ediblər. Prezident İlham Əliyev bundan sonra Türkiyənin yaxın dəstəyi ilə Suriyada sabitlik dövrünün başlayacağına ümidvar olduğunu bildirərək, Azərbaycanın qardaş Türkiyə ilə birlikdə Suriya xalqının üzləşdiyi humanitar problemlərin aradan qaldırılmasına dəstək verməyə hazır olduğunu qeyd edib.
Prezident Rəcəb Tayyib Ərdoğan bütün sahələrdə olduğu kimi Suriya xalqına humanitar yardım və dəstək məsələsində də Azərbaycan və Türkiyənin birgə fəaliyyət göstərəcəyini məmnuniyyətlə qeyd edib. Söhbət əsnasında Azərbaycan və Türkiyə arasında qardaşlıq və strateji müttəfiqlik münasibətlərinin inkişaf perspektivlərinə dair fikir mübadiləsi aparılıb.
Azərbaycanın qardaş dəstəyi...
Bəli, vurğulandığı kimi, Azərbaycan ilə Türkiyə qlobal problemlərin həllində, irəli sürülən təşəbbüslərdə, göstərilən humanitar yardımlarda hər zaman eyni mövqedən çıxış edir. Hər iki ölkə məsələlərə məhz beynəlxalq hüquq və ədalət prinsipləri çərçivəsində yanaşma sərgiləyirlər - bu birlik, birgəlik isə mühüm bir coğrafiyanın iqtisadi əsaslarını gücləndirir, təhlükəsizlik arxitekturasını formalaşdırır, əməkdaşlıq prinsiplərinin sərhədlərini müəyyənləşdirir. Azərbaycan ilə Türkiyə arasındakı əlaqələr qardaşlıq, müttəfiqlik müstəvisində inkişaf edir. Bu mənada Suriyaya nəzərən nümayiş olunan mövqelərin üst-üstə düşməsi də qanunauyğunluq sayılmalıdır. Hər iki dövlət münaqişələrin sülh yolu ilə tənzimlənməsinin tərəfdarı kimi çıxış edir - Türkiyə və Azərbaycan dünyada baş verən hərbi kataklizmlərin sonlandırılması üçün qlobal dünyaya çağırışlar edirlər. Hər iki dövlət yaşıl gələcək uğrunda hədəflərini koordinasiya edərək yeni imkanların yaranması üçün səfərbər olur. Vurğulandığı kimi, Azərbaycan qardaş Türkiyə ilə birlikdə Suriya xalqının üzləşdiyi humanitar problemlərin aradan qaldırılmasına dəstək verməyə hər zaman hazırdır...
XİN: Türkiyə ilə məsləhətləşmələr həyata keçirilir
Qeyd edək ki, Azərbaycan Xarici İşlər Nazirliyinin Suriyada son vəziyyətlə bağlı bəyanatında da bildirilib ki, ölkəmiz Suriyada baş verən prosesləri izləyir. Bu çərçivədə, eyni zamanda, qardaş Türkiyə ilə məsləhətləşmələr həyata keçirilir. Vurğulanıb ki, Suriyada Bəşər əl-Əsəd rejiminin çökməsindən sonra ölkədə sülhün və sabitliyin bərpa olunması, vətəndaş qarşıdurmasına son qoyulması mütləq dərəcədə vacibdir. “Azərbaycan Respublikası Suriyanın ərazi bütövlüyü və suverenliyinə dəstəyini bir daha ifadə edir, Suriya xalqının iradəsinə uyğun şəkildə, habelə ölkədaxili siyasi dialoq vasitəsilə məsələlərin həllini tapacağına ümidvar olduğunu bildirir. Azərbaycan Respublikası qardaş Türkiyə Respublikası və digər həmfikir tərəfdaşlarla birlikdə Suriya xalqının üzləşdiyi humanitar problemlərin aradan qaldırılmasına töhfə verməyə hazırdır”, - deyə bildirilən bəyanatda Azərbaycanın Suriyada səfirliyinin mövcud olmamasına baxmayaraq, Suriyada Azərbaycan vətəndaşlarının sayının və yerinin müəyyən edilməsi istiqamətində iş aparıldığı da yer alır: “Azərbaycan Respublikası, həmçinin 2020-ci ildən başlayaraq Türkiyə Respublikasının ərazisi vasitəsilə həyata keçirilməkdə olan vətəndaşlarımızın Suriya Ərəb Respublikasından ölkəmizə repatriasiyası işini davam etdirəcək. Azərbaycan Respublikası Suriyada vəziyyət sabitləşəndən sonra Azərbaycanla Suriya arasında ikitərəfli münasibətlərin bərpa olunacağına, əməkdaşlığın qarşılıqlı dostluq və tərəfdaşlıq prinsipi əsasında inkişaf edəcəyinə ümidvardır”.
P.İSMAYILOV
