“Mançester Yunayted”in baş məşqçisi Ruben Amorim Avropa Liqasının Liqa mərhələsində “Viktoriya”ya (Plzen) qarşı keçirdikləri oyunu şərh edib.
Arena.az xəbər verir ki, İngiltərə nəhəngi səfərdə qarşılaşdığı Çexiya klubuna 2:1 hesabıyla qalib gəlib.
“Qırmızı şeytanlar”ın portuqal çalışdırıcısı matçdan sonra baş tutan mətbuat konfransında bunları söyləyib:
“Biz oyun irəlilədikcə yaxşılaşdıq. Birinci hissədə oyuna nəzarət etdik, amma heç bir xüsusi fürsətimiz olmadı. Bizdə sürət və hərəkilik əskik idi və topa nəzarət edə bilmirdik. “Viktoriya”nın da fürsətləri yox idi. İkinci hissədə qol buraxdıq, amma bunu yaxşı cavabladıq. Rəqibi meydanın öz yarısına itələdik və qol vura bildik. Hazırda qələbə vacibdir və bu, növbəti oyuna hazırlaşmaq üçün yaxşı səbəbdir”, deyə Ruben Amorim vurğulayıb.
6 turdan sonra 12 xalla “Mançester Yunayted” Avropa Liqasının liqa mərhələsinin yarış cədvəlində 7-ci pillədə qərarlaşıb. “Viktoriya” isə 9 xalla 17-ci yerdədir.
