“Əl-Hilal”ın braziliyalı ulduz hücumçusu Neymar 2026-cı ildə keçiriləcək futbol üzrə dünya çempionatında oynamaq istədiyini bildirib.
Arena.az “RMC Sport” dərgisinə istinadən, braziliyalı ulduzun bu barədə fikrini təqdiim edir:
“Aydındır ki, Dünya Kuboku bütün oyunçuların məqsədidir. Mən mundialda artıq üç dəfə oynamışam və dördüncü dəfə oynamaq istəyirəm. Mən buna diqqət edib köklənməliyəm, burada yaxşı hazırlaşmalı və qayıtdıqdan sonra qarşıma ortamüddətli hədəf qoymalı, burada, klubumda idman formamı qaydasına salmalıyam”, deyə “Ney” vurğulayıb.
Xatırladaq ki, 2026-cı il FIFA Dünya Kuboku həmin il Kanada, Meksika və ABŞ-ın birlikdə təşkilatçılığı ilə iyun ayının 11-dən iyul ayının 19-na qədər müddəti əhatə edəcək.
Neymar “Santos”un məzunudur. “Ney” 2009-2013-cü illərdə “balıqlar”ın əsas komandasında çıxış edib. Bu müddət ərzində Neymar “Santos”un heyətində 225 oyuna çıxıb, 136 qol və 64 məhsuldar ötürmə ilə fərqlənib.
Neymar 2013-2017-ci illər aralığında “Barselona”da çıxış etmiş və “blauqrana”nı öz istəyi ilə tərk edərək, PSJ-yə keçmişdi. Bu keçid hələ də futbol tarixini ən bahalı keçidi olaraq qalmaqdadır – 222 milyon avro məbləğində əməliyyat.
“Ney” “blauqrana”nın heyətində 186 oyuna çıxıb, 105 qol vurub, 76 məhsuldar ötürmə verib. Braziliyalı ulduz “Barselona” ilə İspaniya La Liqasının (2 dəfə), İspaniya Kubokunun (3 dəfə), İspaniya Super Kubokunun, Çempionlar Liqasının, UEFA Super Kubokunun, FIFA Klub Dünya Kubokunun qalibi olub.
Xatırladaq ki, braziliyalı futbolçu ötən il DÇ-2026-nın seçmə mərhələsi çərçivəsində Braziliya millisinin Uruqvay yığmasına qarşı keçirdiyi oyunda (0:2) ağır zədə alaraq, dizinin çarpaz bağlarını yırtmış və bu səbəblə cərrahi əməliyyat edilmişdi. “Ney” ötən həftə Asiya Çempionlar Liqasının “Əl-Ayn”a qarşı oyununda nəhayət ki, yaşıl meydanlara qayıtmışdı. Buna rəğmən “Ney” növbəti oyununda yenidən zədə alaraq, iki həftə müddətinə sıradan çıxıb.
Avropada debütü “Barselona” ilə başlamış Neymar daha sonra Kataloniya klubunu öz isətəyi ilə tərk edib. 2023-cü ilin yayında, PSJ-də 6 il keçirdikdən sonra Neymar “Əl-Hilal”a keçib. Tərəflər arasında sonradan 1 il uzadılmaq imkanını özündə ehtiva edən, müddəti 2025-ci ilin iyun ayının sonuna qədər nəzərdə tutulmuş müqavilə imzalanıb. Transfer ərəblərə 90 milyon avro məbləğə başa gəlib. Bu məbləğ Neymarın təxmin edilən bazar qiymətindən dəfələrlə bahadır.
Təcrübəli hücumçu ötən mövsüm “Əl-Hilal”ın heyətində bütün yarışlarda cəmi 7 oyuna çıxıb, 1 qol vurub, 3 məhsuldar ötürmə verib.
Neymar 2010-cu ilin avqustunda debüt etdiyi Braziliya yığmasının heyətində 128 oyun keçirib, 79 qol vurub, 58 məhsuldar ötürmə verib.
“Transfermarkt” internet-portalı 32 yaşlı braziliyalı hücumçunun transfer dəyərini 30 milyon avro məbləğində qiymətləndirir.
