Bu ilin yanvar-noyabr aylarında xarici ölkələrə gedən Azərbaycan Respublikası vətəndaşlarının ümumi sayı 16,9 faiz artaraq 1998,9 min nəfər olub.
Bu barədə Dövlət Statistika Komitəsindən bildirilib.
Bu dövrdə İrana gedən Azərbaycan Respublikası vətəndaşlarının sayı 33,0 faiz, Rusiya Federasiyasına gedənlərin sayı 13,4 faiz, Gürcüstana gedənlərin sayı 13,0 faiz, Türkiyəyə gedənlərin sayı 9,9 faiz artıb. Azərbaycan Respublikası vətəndaşlarının 41,4 faizi Türkiyəyə, 20,6 faizi Rusiya Federasiyasına, 8,7 faizi Gürcüstana, 8,6 faizi İrana, 20,7 faizi digər ölkələrə səfər edib. Gedənlərin 63,9 faizini kişilər, 36,1 faizini qadınlar təşkil edib.
2024-cü ilin yanvar-noyabr aylarında xarici ölkələrə səfər edən Azərbaycan Respublikası vətəndaşlarının 69,5 faizi hava, 28,4 faizi dəmir yolu və avtomobil, 2,1 faizi isə dəniz nəqliyyatından istifadə edib.
Bu ilin yanvar-noyabr aylarında Azərbaycana dünyanın 195 ölkəsindən 2412,0 min və ya əvvəlki ilin müvafiq dövrü ilə müqayisədə 27,4 faiz çox əcnəbi və vətəndaşlığı olmayan şəxs gəlib.
Gələnlərin 28,2 faizi Rusiya Federasiyası, 16,1 faizi Türkiyə, 8,9 faizi Hindistan, 8,0 faizi İran, 4,1 faizi Gürcüstan, 3,9 faizi Səudiyyə Ərəbistanı, 3,3 faizi Qazaxıstan, 3,0 faizi Pakistan, 1,8 faizi Çin, 1,7 faizi Özbəkistan, 1,6 faizi Birləşmiş Ərəb Əmirlikləri, 1,4 faizi Ukrayna, hər birindən 1,2 faiz olmaqla Türkmənistan və Küveyt, 1,1 faizi İsrail, hər birindən 1,0 faiz olmaqla Oman, Belarus və Böyük Britaniya, 11,5 faizi digər ölkələrin vətəndaşları olmuşdur. Gələnlərin 67,0 faizini kişilər, 33,0 faizini qadınlar təşkil edib.
Ötən ilin eyni dövrü ilə müqayisədə Hindistandan gələnlərin sayı 2,2 dəfə, İspaniyadan - 2,0 dəfə, Cənubi Koreyadan - 2,0 dəfə, Çindən - 1,9 dəfə, Filippindən - 1,6 dəfə, Qırğızıstandan - 1,5 dəfə, Qazaxıstandan - 49,8 faiz, Pakistandan - 48,5 faiz, Omandan - 45,0 faiz, İordaniyadan - 41,6 faiz, Polşadan - 37,9 faiz, İtaliyadan - 37,0 faiz, ABŞ-dan - 35,2 faiz, İrandan - 30,4 faiz, Niderlanddan - 28,5 faiz, Türkmənistandan - 28,1 faiz, Almaniyadan - 28,0 faiz, Yəməndən - 27,7 faiz, Fransadan - 24,5 faiz, Səudiyyə Ərəbistanından - 22,7 faiz, Tacikistandan - 21,8 faiz, Misirdən - 20,8 faiz, Böyük Britaniyadan - 20,3 faiz, Rusiya Federasiyasından - 17,7 faiz, Özbəkistandan - 16,2 faiz, Ukraynadan - 15,9 faiz, Türkiyədən - 13,9 faiz, Moldovadan - 11,3 faiz artıb.
2023-cü ilin yanvar-noyabr ayları ilə müqayisədə Avropa İttifaqına üzv ölkələrdən gələnlərin sayı 37,3 faiz artaraq 106,0 min nəfər, körfəz ölkələrindən gələnlərin sayı 25,3 faiz artaraq 391,9 min nəfər, MDB ölkələrindən gələnlərin sayı 19,4 faiz artaraq 905,8 min nəfər olub.
Ölkəmizə gələn əcnəbilər və vətəndaşlığı olmayan şəxslərin 75,9 faizi hava, 22,9 faizi dəmir yolu və avtomobil, 1,2 faizi isə dəniz nəqliyyatından istifadə edib.
Turizm eksperti Cabir Dövlətzadə “Sherg.az”a bildirib ki, Azərbaycana gələn turist sayında 28 faizlik artımın olması təqdirəlayiq hadisədir:
“Azərbaycanda noyabr ayında COP29 İqlim Dəyişikliyi Konqresi keçirildi. Bu, BMT nin ən böyük konqresi sayılır və həmin müddət ərzində noyabr ayında ciddi bir turist axınını gördük. Təbii ki, noyabr ayındakı tədbirin olması artıma müəyyən dərəcədə təsir göstərib. Hazırda bu il Azərbaycan turizmində müəyyən inkişaf görülür. Çünki Bakıda və bölgələrdə otellərin sayında müəyyən artımlar var. Artıq Azərbaycan turizmi daha çox rəqabətə dayanıqlı bir turizm kimi özünü göstərir. 2025-ci ildə turizmin daha da inkişaf edəcəyini ümid edirik. Əsas məsələ ondan ibarətdir ki, turizm məhsullarının daha çox artırılması ölkə üçün çox vacibdir. Çünki bölgələrdə ekoturizmin inkişafı üçün xeyli şərait mövcuddur. Ekoturizmin ciddi inkişafı Azərbaycan turizminin inkişafına töhfə verəcək. Azərbaycanda Nəbatət bağının açılması da turistlər üçün bir marşrut sayıla bilər. O da Azərbaycan turizm marşrutlarında bir nöqtə kimi qeyd olunacaq. Çünki geniş ərazisi olan Nəbatət bağı turistlər üçün də çox maraqlı olar. Eyni zamanda Xəzər dənizində gəmi turunun fəaliyyətə keçməsi və bunun dayanıqlı olması vacibdir. Çünki müştərilər gəmi turundan istifadəyə üstünlük verirlər. Ümumiyyətlə, raftinq kimi turların yaxın zamanlarda inkişaf etdirilməsi lazımdır. Bu gələn turistlər üçün ekoturizmdə yeri olan növdür. Ekstrem turizmin Azərbaycanda artıq federasiyası var və sırf bu məqsədlə bəzi turistlər ölkəyə gəlirlər. Bu da istər- istəməz o sahənin inkişafına gətirib çıxarır. Ümid edirəm ki, dekabr və yanvar ayları qış turizminin inkişafında ciddi bir təkan olacaq. Çünki artıq bölgələrdə qar yağıb və bununla əlaqədar olaraq qar görməyən ölkələr həmin bölgələri görməyə meyillidirlər. Düşünürük ki, həmin turistlər həm normal, həm də aşağı büdcəli lokost reyslər ilə ölkəmizə gələcəklər. Bu da bölgələrimizdə olan turizmin inkişafına təkan verəcək. Azərbaycandan xaricə gedən turist axınının inkişafı da müsbət meyildir. Çünki ölkədən xaricə gedən turistlər artırsa, bu da istər istəməz ölkə əhalisinin rəfah səviyyəsində olmasının göstəricisidir. Artıq bu da hər il özünü ən azı iki rəqəmli səviyyədə göstərir. Ümid edirik ki, daha da artar. Ümumiyyətlə, xarici ölkələrlə vizaların ləğv edilməsi hər il artır. Bu isə qarşılıqlı turistlərin ölkəmizə gəlməsinə, həm də ölkəmizdə olan vətəndaşların xaricə getməsinə müsbət təsir göstərir”.
