Bu gün futbol üzrə Azərbaycan çempionatında (Premyer Liqa) 2024/2025-ci illər mövsümünün 17-ci turuna start verilib.
Arena.az xəbər verir ki, turun açılış oyunu Şamaxıda keçirilib.
Burada “Şamaxı” “Səbail”i qəbul edib. Qarşılaşma nəzərdə tutulandan (saat 14:00) 20 dəqiqə gec başlayıb. Buna güclü qar səbəbindən Şamaxı şəhər stadionununun qazonunun ağ örpəyə bürünməsi səbəb olub. Stadion əməkdaşları qarı təmizləməyə çalışsa da, buna tam nail ola bilməyiblər. Belə ki, komandalar qismən qarlı ot örtüyündə oynamaq məcburiyyətində qalıblar ki, bu, onsuz da sönük keçən oyunu daha da maraqsız edib.
Bu oyun həm də uzun müddətdir çempionatda qələbə üzünə həsrət qalmış iki komandanın dueli kimi əlamətdar idi. Belə ki, “Şamaxı” 9, “Səbail” isə 7 oyun idi 3 xal üzünə həsrət idi. Əyalət təmsilçisi bu görüşlərdə cəmi 2 dəfə heç-heçə edə bilmişdi. Paytaxt klubu isə cəmi 1 heç-heçəsi ilə təsəlli tapmışdı.
Elə bu oyunda da komandaların qələbə həsrəti davam edib. Belə ki, tərəflər meydanı qolsuz heç-heçə ilə tərk ediblər.
Şamaxının eyniadlı təmsilçisi hazırda 14 xalla Premyer Liqanın yarış cədvəlində 13 xalla 7-ci sırada qərarlaşıb. “Səbail” isə 9 xalla sonuncu – 10-cu sıradadır.
Premyer Liqa
17-ci tur
14 dekabr
“Şamaxı” – “Səbail” 0:0
Hakimlər: Əliyar Ağayev, Zeynal Zeynalov, Akif Əmirəli, Kamran Əliyev.
VAR: Rauf Allahverdiyev.
AVAR: Pərvin Talıbov.
Hakim-inspektor: İmanxan Sultani.
AFFA nümayəndəsi: Məmmədəli Məmmədov.
Şamaxı şəhər stadionu, 14:00.
Şamaxı: 1. Rikardo Fernandes, 17. Rafael Məhərrəmli, 5. Arsen Ağcabəyov, 6. Rauf Rüstəmli, 82. Rüfət Abbasov, 24. Edqar Adilxanov, 32. Vasili Radenoviç, 11. Conatan Benteke, 20. Leroy Mikels (k), 9. Belaydi Pusi, 66. Vasili Bakiç.
Ehtiyat oyunçular: 85. Kamal Bayramov, 62. Abdulla Seydəhmədov, 60. Səbayıl Bağırov, 80. Zahid Mərdanov, 13. Ramin Əhmədov, 22. Qurban Səfərov, 19. Fəxri Məmmədli.
Baş məşqçi: Ayxan Abbasov.
Səbail: 1. Hüseynəli Quliyev, 74. Yusif Nəbiyev (k), 77. Fərid Nəbiyev, 18. Süleyman Əhmədov, 20. Mert Çelik, 83. Nihad Quliyev, 19. Samir Abdullayev, 8. Qorka Larruçea, 3. Dmitri Litvin, 7. Madi Keta, 14. Suleyman Alluş.
Ehtiyat oyunçular: 12. Əlirza Müştəbazadə, 6. Cabir Əmirli, 15. Vüsal Məsimov, 17. Gülağa Əsədov, 16. Emin Rüstəmov, 97. Oruc Məmmədov, 36. Azad Əsgərov, 5. Gitay Sofir.
Baş məşqçi: Cavid Hüseynov.
