Futzal üzrə Azərbaycan milli komandasının üzvü Nihad İsmayılov federasiyanın mətbuat xidmətinə açıqlama verib.
Arena.az xəbər verir ki, Avropa çempionatının (AÇ-2026) əsas mərhələsində mübarizə aparacaq futzal yığmamız dekabrın 17-də İsveç millisi ilə qarşılaşacaq.
Komandamız dekabrın 9-dan təlim-məşq toplanışına yığışıb və hazırlığını plana uyğun şəkildə davam etdirir. Millimizin üzvü Nihad İsmayılov Azərbaycan Futzal Federasiyasının rəsmi saytına açıqlamasında həm toplanışı dəyərləndirib, həm də rəqiblə bağlı fikirni bildirib:
“Hazırlıq yüksək səviyyədə davam edir. Məşq prosesi elə qurulub ki, həm taktiki, həm də fiziki hazırlığı yaxşılaşdırmaq baxımından tapşırıqlar verilir. Bilirik ki, bizi vacib oyunlar gözləyir. Çalışırıq ki, məşqdə daha çox tər tökək ki, oyunda bunun bəhrəsini görək. Hər kəs məsuliyyətini anlayır”.
Komandada əhval-ruhiyyənin yaxşı olduğunu deyən futzalçı İsveçin Yunanıstana qarşı keçirdiyi oyunu da izlədiklərini, rəqiblər haqda artıq müəyyən informasiyaya malik olduqlarını vurğulayıb: “Yer aldğımız qrupda mübarizəyə start verilib. İsveç doğma meydanda Yunanıstanı qəbul edib. Komanda şəklində izlədiyimiz bu görüşün favoriti skandinavlar hesab edilsə də, yekun bir qədər gözlənilməz oldu. Meydan sahibləri oyunun əksər hissəsini hücumda keçirsə də, yunanların əks-hücumlarının qarşısını ala bilməyib.
İsveçin imkan tapdıqca uzaqdan qapı istiqamətinə zərbələr endirdiyinin şahidi olduq. Ümumiyyətlə, rəqibimizi məşqçilərimiz analiz edib, oyun zamanı nələrə diqqət edəcəyimizi də deyəcək. Özümüz də müəyyən nəticələr çıxarmışıq. Doğma meydanda oynayacağıq. İstəyimiz həm azarkeşlərimizi sevindirmək, həm də rəsmi oyunlara uğurlu nəticə ilə start verməkdir. Azarkeşlərimizə səslənirəm, gəlin oyunu canlı izləyin, uğura doğru birgə addımlayaq”.
Qeyd edək ki, Azərbaycan – İsveç oyunu dekabrın 17-də Bakı İdman Sarayında keçiriləcək. Saat 20:00-da start götürəcək görüşdə azarkeşlər üçün zala giriş biletsiz olacaq.
