Roma Katolik Kilsəsinin rəhbəri Papa Fransisk 88 yaşını qeyd edir.
AZƏRTAC pontifikin doğum günündə onun həyat və fəaliyyətinin bəzi məqamlarına nəzər salır.
Atası Jose Mario Fransisk İtaliyanın Piemont bölgəsindən Argentinaya mühacirət edib və burada italyan əsilli Regina Maria Sivori ilə evlənib. Fransisk (Papa olmamışdan əvvəlki adı - Jorge Mario Bergoglio) 1936-cı il dekabrın 17-də Argentinanın Buenos-Ayres əyalətinin Flores kəndində anadan olub. Beş uşaqlı ailədə böyüyən Fransisk orta təhsilini başa vurduqdan sonra kimyaçı olub, 1958-ci ildə Yezuitlərə qoşulub, Çilidə humanitar elmlər üzrə təhsil alıb, 1960-cı ildə Buenos-Ayresdə fəlsəfə təhsilini və 1970-ci ildə katolik teoloji təhsilini tamamlayıb. Argentinanın rəsmi dili olan ispan və doğma italyan dillərində, həmçinin alman dilində mükəmməl danışır. Bundan başqa, ingilis, fransız və portuqal dillərini bilir. Universitetdə təhsil aldığı müddətdə latın və qədim yunan dillərini də öyrənib.
Fransisk 1992-ci il mayın 20-də Papa II İohan Pavel tərəfindən Buenos-Ayresin köməkçi yepiskopu təyin edilib. Bir neçə müxtəlif titul və vəzifələrdən sonra Papa II İohan Pavel ona 2001-ci ildə kardinal keşiş titulu verərək Kardinallar Heyətinə seçib. Fransisk həm Argentina, həm də İtaliya vətəndaşlığına malikdir. Bundan əlavə, kardinal olmaqla o, Vatikan vətəndaşlığını da alıb.
Roma Katolik Kilsəsinin keçmiş rəhbəri XVI Benedikt bu vəzifədən 2013-cü ildə istefa verib və Fransiskin Papa seçilməsi 2013-cü il martın 13-də Vatikanda Sikstin Kapellasının bacasından qalxan ağ tüstü ilə dünyaya elan edilib. O, iki günlük qısa seçim prosesindən sonra 115 kardinal arasından seçilib və 266-cı Papa olub. Fransisk Amerika və Cənub yarımkürəsindən seçilən ilk Papadır.
Roma Papası 2016-cı ilin oktyabrında Prezident İlham Əliyevin dəvəti ilə Azərbaycana səfər edib, Heydər Məscidində ölkəmizdə fəaliyyət göstərən dini icmaların nümayəndələri ilə görüşüb. O, Papa olduğu müddətdə 47-ci apostol səfərinə gedib, 67 ölkəni ziyarət edib.
İtaliyanın “Lucky Red” film yayımı və istehsal şirkəti Papa Fransiskin “Həyat” adlı ilk avtobioqrafiyası əsasında çəkilmiş filmi yaxın vaxtlarda böyük ekrana çıxaracaq. Kitab 2024-cü ilin martında “HarperCollins Italia” nəşriyyatında çapdan çıxıb. Bundan başqa, Fransiskin uşaqlığından bəhs edən “Ümid” adlı kitab isə Vatikanda hər 25 ildən bir təşkil olunan Müqəddəs Yubiley İli münasibətilə gələn il yanvarın 14-də işıq üzü görəcək və 100-dən çox ölkədə satışa çıxarılacaq.
Nihad Budaqov
AZƏRTAC-ın xüsusi müxbiri
Vatikan
