Hollivud aktyoru Bred Pitt uşaqları ilə münasibətləri bərpa etmək üçün spirtli içkidən imtina edib.
seher.media xəbər verir ki, bu barədə "Radar Online" nəşri məlumat yayıb.
"Səkkiz il əvvəl baş verən ayrılıqdan sonra onun uşaqları ilə münasibətləri hələ də tam bərpa olunmayıb. Bu, çox çətin bir proses olub, lakin Bred təslim olmur - o, ailəsini xilas etmək istəyir", - deyə ulduzlara yaxın mənbə bildirib.
Məlumata görə, Ancelina Coli ilə ayrıldıqdan sonra aktyor uşaqlarına özü üzərində işlədiyini sübut etməyə çalışıb. Bred Pitt terapiyaya gedib, spirtli içkidən imtina edib və keçmiş səhvlərini düzəltməyə cəhd göstərib. Hazırda aktyor Milad möcüzəsi üçün dua edir və uşaqları ilə ünsiyyətin bərpa olunacağına ümid edir.
Bred Pitt və Ancelina Coli 2016-cı ildə təyyarədə baş verən mübahisədən sonra ayrıldıqlarını elan ediblər. Həmin hadisə zamanı aktrisanın və altı uşaqdan ən azı ikisinin üstünə spirtli içki tökülüb.
Cütlüyün altı övladı var: oğlanları Meddoks Şivan, Paks Tyen və Noks Leon, qızları isə Zaxara Marli, Şaylo Nuvel və Vivyen Marşelin. Hamısı əvvəlcə Coli-Pitt soyadını daşıyırdı, lakin yalnız üçü - Şaylo, Noks və Vivyen Ancelina və Bredin bioloji övladlarıdır.
Cütlüyün boşanması yalnız 2019-cu ildə rəsmən başa çatıb. Hazırda keçmiş həyat yoldaşları arasında əmlak bölgüsü davam edir.
