Monteneqroda 10 nəfəri qətlə yetirməkdə və dörd nəfəri yaralamaqda şübhəli bilinən şəxs intihar edib.
Bunu ölkənin daxili işlər naziri Danilo Şaranoviç mətbuat konfransında açıqlayıb.
“Polis əməliyyatı uğurla həyata keçirilib. Beləliklə, həmin şəxs polis əməkdaşlarının operativ fəaliyyəti nəticəsində təcrid edilib. Çıxılmaz vəziyyətdə olduğu aydın olan anda o, özünə qəsd etməyə cəhd göstərib”, – DİN rəhbəri bildirib.
Onun sözlərinə görə, şübhəli şəxs xəstəxanaya aparılarkən aldığı xəsarətlərdən yolda keçinib.
Milli mətbuatda yer alan xəbərlərdə şübhəli şəxsin daha əvvəl də qanunsuz silah saxladığı üçün saxlanıldığı bildirilib.
Monteneqro prezidenti Yakov Milatoviç Çetinyedə baş verən faciə ilə bağlı dərin narahatlığını ifadə edib və həyatını itirənlərin yaxınlarına başsağlığı verib.
Monteneqro hökuməti hücumla əlaqədar 3 günlük milli matəm elan edib.
Region ölkələrinin Serbiya, Bosniya və Herseqovina və Xorvatiya liderləri hadisədən sonra başsağlığı mesajı yayıblar.
