“Milan”ın yeni baş məşqçisi Serjio Konseysao “rossoneri”nin və Portuqaliya yığmasının cinah hücumçusu Rafael Leao haqda söhbət açıb.
Arena.az “Football Italia” nəşrinə istinadən, portuqal mütəxəssisin bu barədə fikrini təqdim edir:
“Leao müəmmalıdır. Mən onu çoxdan tanıyıram, o da mənim kimi portuqaldır, amma o, daha rahat portuqaldır, mən isə daha gərginəm. O, bir neçə xüsusu öyrənməlidir və mən inanıram ki, o, dünyanın ən yaxşı oyunçusu ola bilər. Mən də ona demişəm ki, o, çoxlu fərdi keyfiyyətlərə malikdir və onları komandada işə salsa, daha da yaxşılaşa bilər. Bütün bunları öyrənsə, növbəti mövsümdə onun, dünyanın ən yaxşısı ola biləcəyinə şübhəm yoxdur”, deyə Konseysao vurğulayıb.
Rafael Leao Lissabon “Sportinq”inin yetirməsidir. Portuqaliyalı cinah hücumçusu “Milan”a 2019-cu ilin avqustunda 29,5 milyon avro məbləğ müqabilində “Lill”dən keçib.
Tərəflər arasındakı müqavilənin müddəti 2028-ci ilin iyun ayının sonuna qədər qüvvədədir.
Cari mövsümdə Leao “Milan” üçün bütün yarışlarda 23 oyun keçirib, 6 qol və 7 məhsuldar ötürmə ilə fərqlənib.
Leaonun “rossoneri”nin heyətində çıxışının ümumi mənzərəsi 233 oyun, 64 qol, və 56 məhsuldar ötürmədən ibarətdir.
Rafael Leao “Milan”la 2021/2022-ci illər mövsümü İtaliya A Seriyasının, 2024-cü il İtaliya Super Kubokunun qalibi olub. Həmçinin Leao 2021/2022-ci illər mövsümü İtaliya A Seriyasında ilin oyunçusu seçilib.
Rafael Leao 2021-ci ilin oktyabr ayında debüt etdiyi Portuqaliya yığmasının heyətində 37 oyun keçirib, 5 qol vurub, 7 məhsuldar ötürmə verib. Portuqaliyalı cinah hücumçusunun aşağı yaş dəstələrində ibarət yığma komandalarda zəngin oyun təcrübəsi var. Əsas yığmada debütə qədər Rafael Leao U-16, U-17, U-18, U-19, U-20, U-21 yığmalarının heyətinə dəvət alıb və U-18 yığmasından başqa bütün komandaların heyətində çoxlu oyunlar keçirib və qollar vurub. Leao Portuqaliyanın U-17 yığması ilə Avropa çempionatının (2016) qalibi olub.
“Transfermarkt” internet-portalı 25 yaşlı portuqal sol cinah hücumçusunun transfer dəyərini 75 milyon avro məbləğində qiymətləndirir.
