Avropa İttifaqı Slovakiyanı demokratik normaları pozduğuna görə qınamaq üçün təklif hazırlayır ki, bu da Bratislava üçün nəzərdə tutulan vəsaitin bloklanmasına səbəb ola bilər.
Qaynarinfo xəbər verir ki, bu barədə "Bloomberg” məlumat yayıb.
Avropa Komissiyası Slovakiyanın populist Baş naziri Robert Fikonun Aİ fondları ilə əlaqəli bəzi korrupsiya hallarını araşdıran xüsusi prokurorluğu ləğv etmək qərarı ilə bağlı araşdırmalara səbəb olan sənəd hazırlayıb.
Proses hələ ilkin mərhələdədir və Avropa Komissiyasının rəhbəri Ursula fon der Lyayenin təsdiqini tələb edir.
Slovakiyada dövlət investisiyalarının təxminən 80%-i Aİ fondları tərəfindən maliyyələşdirilir. Bu vəsaitlərə qarşı istənilən təhlükə həm də avrozonanın bir hissəsi olan və büdcə kəsirləri səbəbindən problemlərlə üzləşən bu ölkənin iqtisadiyyatına ciddi zərbə vura bilər.
Təkliflərdən biri komissiyanın vəsaitlərinin sui-istifadəsi riski olduqda Aİ-yə maliyyələşməni dayandırmağa imkan verən mexanizmi tətbiq etməkdir. Mənbələr bildiriblər ki, bu mexanizm çərçivəsində Avropa İttifaqı Slovakiyaya büdcədən ayrılan 12,8 milyard avronun bir hissəsini dondura bilər.
Aİ-nin anti-böhran tədbirləri çərçivəsində COVID-19 ilə mübarizə üçün Slovakiyaya ayrılmış 2,7 milyard avronun hamısının və ya bir hissəsinin geri çəkilməsi ehtimalı da nəzərdən keçirilir, çünki xüsusi prokurorluğun mövcudluğu bu vəsaitin təmin edilməsi üçün şərtlərdən biri idi.
Macarıstan qanunun aliliyi pozuntularına görə 6,3 milyard avro dondurulduqdan sonra Slovakiya Aİ-nin şərt mexanizminə tabe olan ikinci ölkə ola bilər.
Nizami Bağırov
