Bu gün Rusiyanın paytaxtı Moskvaya pilotsuz təyyarələrin kütləvi hücumu olub.

Reyting.az xəbər verir ki, ilk dron saat 2:20-də Lyubertsı rayonunda vurulub. Sonra pilotsuz təyyarələr Moskva yaxınlığındakı Jukovskidə məhv edilib.

Yerli əhalinin dediyinə görə, əvvəlcə ən azı altı partlayış səsi eşidiblər.

Moskva vilayətinin qubernatoru Vorobyev saat 05:23-də bildirib ki, Rusiya hava hücumundan müdafiə qüvvələri Podolsk, Ramenskoye, Lyubertsı, Domodedovo və Kolomna şəhər rayonlarında 14 PUA-nı məhv edib.

Sonradan Rusiya mediası Ramenskoyedə çoxmərtəbəli binaların zədələndiyini, 11-12-ci mərtəbələr ərazisindəki mənzillərin yandığını bildirib.



Hücum nəticəsində hündürmərtəbəli binalardan birində ən azı 20 mənzilə ziyan dəyib. Hündürmərtəbəli binalara hücum nəticəsində üç qurbanın qəlpə yaraları olduğu bildirilir.

Jukovski hava limanı yaxınlığında PUA-nın qəzaya uğradığı da verilən məlumatlar sırasındadır. Bundan əlavə, PUA Moskva vilayətinin Ramenski rayonunun Prudki kəndində fərdi yaşayış binasının yaxınlığına, binanın arxasındakı meşəyə düşüb.

İddiaya görə, Moskva bölgəsinə hücum üçün “Fierce” tipli dronlardan istifadə edilib.

Onu da qeyd edək ki, Ukraynanın PUA hücumları nəticəsində Moskvanın Şeremetyevo, Domodedovo və Jukovski hava limanlarında uçuşlar təxirə salınıb və ya ləğv edilib.




ELÇİN