“Barselona”nın alman qapıçısı Mark-Andre ter Ştegen zədəli dizindən cərrahi əməliyyat edildikdən sonra ilk dəfə ictimaiyyətlə əlaqəyə çıxıb.
Arena.az alman qapıçının özünün sosial şəbəkə hesabları üzərindən paylaşdığı müraciətini təqdim edir:
“Bazar günündən bəri mənə göstərdiyiniz dəstəyə və məhəbbətə görə bütün “Barsa” azarkeşlərinə, komanda yoldaşlarıma, rəqiblərə, klublara və dostlarıma həqiqətən minnətdaram.
“Vilyarreal” azarkeşlərinə stadionda göstərdikləri hörmətə görə təşəkkür etmək istəyirəm. Bu, mənim üçün çox şey deməkdir. Mən özümü nikbin və güclü hiss edirəm. İndi isə bütün diqqətimi bərpa olunmağıma yönəldirəm. Təşəkkür edirəm!”, – Ter Ştegenin paylaşımında qeyd olunub.
Xatırladaq ki, təcrübəli qapıçı “Barselona”nın İspaniya La Liqasının 6-cı turu çərçivəsində “Vilyarreal”ı 5:1 hesabı ilə məğlub etdiyi səfər oyununda ağır zədələnib. Daha sonra alman qapıçı uğurla cərrahi əməliyyat edilib və hazırda sağlama mərhələsindədir. Ardınca isə Ter Ştegeni bərpa mərhələsi gözləyir. Qapıçının 7 aydan 8 aya qədər qapılar önündə görünməyəcəyi təxmin edilir.
Mark-Andre Ter Ştegen Mönxenqladbax “Borussiya”sının yetirməsidir. Alman qapıçı məhz yetirməsi olduğu klubun düşərgəsindən 2014-cü ilin iyulunda 12 milyon avro məbləğ müqabilində “Barselona”ya keçib. Ter Ştegenin “Barselona” ilə müqaviləsi 2028-ci ilin iyun ayının sonuna qədər qüvvədədir.
Cari mövsümdə Ter Ştegen “blauqrana” üçün 7 oyun keçirib, 7 qol buraxıb, 1 oyunda “çərçivəsini” qoldan qoruya bilib.
Alman qapıçı “Barselona”nın heyətində ümumilikdə 420 oyuna çıxıb, 412 qol “yeyib” və 175 oyundan “quru” qurtulub.
Ter Ştegen “Barselona” ilə 5 dəfə İspaniya Liqasının, 5 dəfə İspaniya Kral Kubokunun, 3 dəfə İspaniya Super Kubokunun, Çempionlar Liqasının, UEFA Super Kubokunun, FIFA Klub Dünya Kubokunun qalibi olub.
Ter Ştegen 2012-ci ilin mayında debüt etdiyi Almaniya yığmasının heyətində 42 oyuna 50 qol buraxıb, 12 “quru” oyun keçirib. Ter Ştegen Almaniya yığması ilə 2017 Konfederasiyalar Kubokunun qalibi, həmçinin U-17 və U-19 yığmalarının heyətində Avropa çempionatının qalibi olub.
“Transfermarkt” internet-portalı 32 yaşlı alman qapıçının transfer dəyərini 28 milyon avro məbləğində qiymətləndirir.
