“Real”ın baş məşqçisi, italyan mütəxəssis Karlo Ançelotti hansı tənqidin ona toxuna biləcəyi ilə bağlı sualı cavablayıb.
Arena.az “Madrid Universal” dərgisinə istinadən, italyan mütəxəssisin müvafiq cavabını təqdim edir:
“Mənə tənqid toxunmur, əgər bu, mənim peşəkarlığıma, səhv dəyişikliklərə, heyət seçimimə aiddirsə. Bütün bunlar mənim şəxsiyyətimə, iş tərzimə təsir etmir. Amma tənqid mənim şəxsiyyətimə yönəldildikdə, bu, mənim kimliyimə zərbə vurur. Məni ən çox narahat edən də budur. Kiməsə axmaq bir şey etdiyini söyləmək, bir insana axmaq olduğunu deməklə eyni deyil. Bu, tamam başqa bir xüsusdur”, deyə Ançelotti vurğulayıb.
Karlo Ançelotti məşqçiliyə 1992/1993-cü illər mövsümündə, İtaliya yığmasında baş məqşçinin köməkçisi olaraq başlayıb. 1995/1996-cı ilər mövsümündən isə italyan mütəxəssis müstəqil surətdə məşqçiliyə baş vurub.
Xatırladaq ki, 65 yaşlı italyan mütəxəssisin “Real”la ilk macərası 2013-2015-ci illəri əhatə edib. Daha sonra 2021-ci ildə “kral klubu”na geri qayıdaraq, Ançelotti indiyədək “qaymaqlılar”ı çalışdırır. Karlo Ançelottinin İspaniya nəhəngi ilə müqaviləsi 2026-cı ilin iyun ayının sonuna qədər qüvvədədir.
Təcrübəli mütəxəssisin rəhbərliyi altında “Real”ın qazındığı qalibiyyətlərə İspaniya La Liqası (2021/2022, 2023/2024), İspaniya Kral Kuboku (2013/2014, 2022/2023), İspaniya Super Kuboku (2021/2022, 20223/2024), Çempionlar Liqası (2013/2014, 2021/2022, 2023/2024), UEFA Super Kuboku (2014, 2022, 2024) və FIFA Klub Dünya Kuboku (2014, 2022) daxildir.
Karlo Ançelottinin məşqçilik məktəbindən həmçinin “Everton”, “Napoli”, “Bayern”, PSJ, “Çelsi”, “Milan”, “Yuventus”, “Parma” və “Recana” keçiblər.
