Kiyev, 18 dekabr, AZƏRTAC
ABŞ-ın yeni seçilmiş prezidenti Donald Tramp yaxşı bilir ki, Ukrayna təslim olmaq və ya müharibəni dondurmaq istəmir. Eyni zamanda, Tramp ölkəmizdəki münaqişə məsələsinin həlli üçün tez hərəkətə keçmək istəyir.
AZƏRTAC xəbər verir ki, bu barədə “Le Parisien”ə müsahibəsində bunu Ukrayna Prezidenti Volodimir Zelenski deyib.
Zelenski Parisdə Trampla danışıqların nəticələrini şərh edərkən bildirib: "Tramp mənim Ukraynanın ziyanına heç bir yerə tələsməmək istəyimi bilir. Ölkə uzun müddətdir öz suverenliyi üçün mübarizə aparır. Nə qədər prezident və ya baş nazir müharibənin bitdiyini elan etmək istəsə də, biz getməyəcəyik. Sadəcə təslim olmaq və müstəqilliyimizdən imtina etməyəcəyik. Təhlükə ondan ibarət olar ki, biz müharibəni donduraq və ruslarla razılığa gələk”, - deyə Zelenski əlavə edib.
Zelenski vurğulayıb ki, Tramp müharibənin həlli istiqamətində çox sürətlə hərəkət etmək istəyir. Bununla belə, onun ehtiyac duyduğu bütün məlumatları hələ əldə etmək imkanı yoxdur.
“Hazırda Tramp hələ Ağ Evdə deyil və bütün məlumatlara çıxış əldə edə bilməz - kəşfiyyat, Müdafiə Nazirliyi, müəyyən diplomatik kanallar və sair məlumatlar”, - deyə Ukrayna Prezidenti bildirib.
Zelenski həmçinin qeyd edib ki, Trampın Ağ Evə gəlişi ilə Amerika Birləşmiş Ştatlarında baş verən dəyişikliklərin Ukraynanın xeyrinə olması vacibdir. İndi Ukrayna komandaları artıq Trampın komandaları ilə işləyir.
"Biz ABŞ-ın Ukraynaya daha güclü dəstəyini görmək istərdik. Komandalarımız artıq Prezident Trampın komandası ilə işləyir. Biz yeni Administrasiya ilə əlaqələr quracağıq, bu, bizim prioritetimiz olacaq. ABŞ bu müharibədə bizim aparıcı donorumuz olub və olaraq qalır. Ukrayna üçün həm Avropa, həm də ABŞ vacibdir. Biz heç kimi bir-birindən üstün tutmuruq", - deyə Zelenski qeyd edib.
Ukrayna Prezidenti həmçinin əlavə edib ki, Amerika Vladimir Putinə təsir edə bilər.
Xatırladaq ki, daha əvvəl Volodimir Zelenski Rusiyanın Ukraynaya qarşı müharibəsini dayandırmaq üçün səylərin 2025-ci ilin yanvarında gücləndiriləcəyini bildirib. Dövlət başçısının sözlərinə görə, bu, Trampın yanvarın 20-də baş tutacaq andiçmə mərasimindən sonra baş verəcək.
Emil Hüseynli
AZƏRTAC-ın xüsusi müxbiri
Kiyev
