"“Gənc psixometrik” təcrübə proqramına qəbul elan edirik və proqrama qoşulmaq istəyənlər saytımızda müvafiq bölmədən qeydiyyatdan keçə bilərlər".
Bakıvaxtı.az xəbər verir ki, bunu Dövlət İmtahan Mərkəzinin sədri Məleykə Abbaszadə jurnalistlərə açıqlamasında deyib.
O bildirib ki, Dövlət İmtahan Mərkəzinin yeni “Gənc psixometrik” təcrübə proqramı üç ay müddətində davam edəcək:
"Təcrübə proqramının əsas məqsədi təhsilin qiymətləndirilməsi və psixometriya sahəsində nəzəri və praktik biliklərin mənimsənilməsi, statistik təhlil metodlarının öyrədilməsi və qiymətləndirmə alətlərinin effektiv tətbiq edilməsi üçün mütəxəssislər hazırlamaqdır".
DİM sədri qeyd edib ki, təcrübə proqramına gənc müəllimlər, universitetlərin, magistaturanın son kursunda oxuyanlar, xüsusən də, riyaziyyat, informatika və statistika üzrə təhsil alan gənclər müraciət edə bilərlər.
"Üç aylıq təcrübə proqramına qoşulan bu gənclər proqramı bitirdikdən sonra DİM tərəfindən əməkdaşlığa dəvət ediləcəklər".
Məleykə Abbaszadə onu da qeyd edib ki, hazırda əmək bazarında psixometriya sahəsində kadrlara ciddi ehtiyac var.
DİM-in könüllülər proqramı ilə bağlı danışan sədr gənclərin layihəyə böyük maraq göstərdiyini və dörd mindən artıq şəxsin qeydiyyatdan keçdiyini vurğulayıb.
