Qaraciyərdə anormal yağ yığılması vəziyyətinə "qaraciyər yağı" yaxud qaraciyər yağlanması (steatoz) deyilir. Bu halda qaraciyərin normal funksiyalarını yerinə yetirməsi çətinləşir. Yağlı qaraciyər alkoqol istehlakı, piylənmə, diabet, qidalanma, həddindən artıq yağlı qidalar və yüksək xolesterol kimi amillərə görə inkişaf edə bilər. Elmi araşdırmalar göstərir ki, bəzi qidaların müntəzəm istehlakı ilə qaraciyər yağlanmasının qarşısını almaq olar.
Bizim.Media həmin qidaları təqdim edir:
QIRMIZI ÇUĞUNDUR
2015-ci ildə “Journal of Food Science” jurnalında dərc edilən məqalədə qırmızı çuğundur ekstraktının qaraciyərə təsiri araşdırılıb. Tədqiqat nəticəsində qırmızı çuğundur istehlakının qaraciyərdə oksidləşdirici stressi azaltdığı və qaraciyərin detoksifikasiya yollarını dəstəkləyən fermentlərin fəaliyyətini artırdığı müşahidə edilib. Diabet xəstələrinə çuğunduru qəbul etməzdən əvvəl həkimə müraciət etmələri tövsiyə olunur.
SARIKÖK
Sarıkök tərkibindəki “curcumin” birləşməsi sayəsində antiinflamatuar xüsusiyyətlərə malikdir.
Böyük Britaniyanın Nyukasl Universitetində 2017-ci ildə aparılan bir araşdırma göstərib ki, sarıkök yağlı qaraciyər və qaraciyər iltihabını azaldır.
YULAF
Yulaf həll olunan liflə zəngindir və qaraciyərin yağ mübadiləsini yaxşılaşdıra bilər. Yulafların tərkibində olan betaqlükanlar qaraciyərin yağları emal etmək qabiliyyətini artıra bilər.
BROKOLİ
Brokoli kimi tərəvəzlərin tərkibində qlükozinolatlar var ki, bu da qaraciyərin yağları daha yaxşı metabolizə etməsinə kömək edir. Bu tərəvəzlər qaraciyərin detoksifikasiya proseslərini dəstəkləyir.
AVOKADO
Avokado sağlam yağlar və antioksidantlarla zəngin bir qidadır. Bəzi tədqiqatlar göstərir ki, avokado yağlı qaraciyəri azaldan təsirlərə malik ola bilər. Kaliforniya Universiteti tərəfindən aparılan bir araşdırmada avokadonun qaraciyər yağlanması riskini azaltdığı aşkar edilib.
SARIMSAQ
Sarımsaq təbii antioksidantdır və qaraciyərin yağları daha yaxşı metabolizə etməsinə, bundan əlavə, qaraciyəri toksinlərdən təmizləməyə kömək edə bilər.
Misirin Qahirə Universitetində 2018-ci ildə aparılan bir araşdırma sarımsağın yağlı qaraciyərə müsbət təsirini göstərib.
QƏHVƏ
Qəhvə qaraciyər sağlamlığını yaxşılaşdırmağa kömək edə biləcək mühüm birləşmələri ehtiva edir. Qəhvədəki kofein və polifenollar qaraciyərin yağ mübadiləsini yaxşılaşdıra bilər.
Nəzrin Mirzəyeva, Bizim.Media
- Gecə Modu
- Ana səhifə
- Statistika
- Mənbələr
- Reytinq
- Hava
- Valyuta
