Türkiyə Prezidenti Rəcəb Tayyib Ərdoğan Albaniya və Serbiyaya rəsmi səfər edəcək.
Türkiyə Prezidenti Administrasiyasının İctimaiyyətlə Əlaqələr İdarəsindən verilən məlumata görə, oktyabrın 10-11-də baş tutacaq səfərlər zamanı ikitərəfli münasibətlərin bütün aspektlərinin nəzərdən keçirilməsi və müxtəlif sahələrdə mövcud əməkdaşlığın daha da inkişaf etdirilməsi istiqamətində atılacaq addımların müzakirə olunması nəzərdə tutulur.
Səfərlər çərçivəsində prezident Ərdoğan hər iki ölkədəki həmkarları ilə qurulan yüksək səviyyəli əməkdaşlıq şurası iclaslarına sədrlik edəcək.
Albaniyanın baş naziri Edi Ramanın iştirakı ilə Türkiyə tərəfindən maliyyələşdirilən Balkanların ən böyük məscidi olan Tirana Namazgah məscidinin açılışı da baş tutacaq.
Daha sonra, Prezident Ərdoğan Belqrada gedəcək və burada Serbiya prezidenti Aleksandr Vuçiçlə birlikdə biznes forumda iştirak edəcək. Səfərlər nəticəsində ikitərəfli münasibətlərin müqavilə əsaslarının inkişaf etdirilməsi məqsədilə bir sıra sazişlərin imzalanması planlaşdırılır.
Görüşlərdə həmçinin aktual qlobal və regional məsələlər, xüsusilə Balkanlar, Qəzza, işğal olunmuş Fələstin torpaqları və İsrailin Livana hücumları ətrafında müzakirələr aparılacaq.
