COP29 bütün dünya ictimaiyyəti, eləcə də qlobal sammitin Sinerji Tərəfdaşı olan “NEQSOL Holding” üçün müstəsna əhəmiyyətə malik olub.
Bu tərəfdaşlıq “NEQSOL Holding”ə dünya liderləri ilə əlaqələrin genişləndirilməsi, bilik-təcrübə mübadiləsi və innovativ həllərin müzakirəsi üçün unikal platforma təqdim edib ki, bu da holdinq və onun tərkibindəki şirkətlər – Nobel Energy, Norm, Bakcell, Azerconnect Group və s. üçün iqlim dəyişikliyi ilə mübarizə təşəbbüslərinə töhfə vermək imkanlarını gücləndirib.
COP29-da “NEQSOL Holding” 20-yə yaxın müxtəlif tədbirlər, həmçinin panel müzakirələr və təqdimatlar, təşkil edib.
Bu tədbirlərdə 60-dan çox məruzəçi və moderator, eləcə də 700-dən çox dinləyici iştirak edib. COP29 Yaşıl Zonasında “NEQSOL Holding” pavilyonu yüzlərlə ziyarətçi ilə qarşılıqlı əlaqə, görüş və müzakirələrin mərkəzinə çevrilib.
Panel sessiyaları geniş sahələri əhatə edib: Azərbaycanda sement və beton sənayesi üçün Xalis Sıfır (Net Zero) yol xəritəsi; Bərpa olunan enerji layihələri; Təmiz enerji və karbon tutma texnologiyaları; Dayanıqlı icmaların inkişafında rəqəmsal platformaların rolu; Rəqəmsal gələcək üçün bacarıqların inkişafı; Təhsil və təqaüd təşəbbüsləri vasitəsilə dayanıqlı icmaların inkişafı; Dayanıqlı inkişaf üçün liderlik bacarıqlarının inkişafı; İqlim və sağlamlıq: dayanıqlı cəmiyyətlərin inkişafında sosial məsuliyyət tərəfdaşlıqlarının rolu;Neyromüxtəliflik; ESG (ekoloji, sosial və korporativ idarəetmə) və risklərin idarə edilməsi; Biznes etikası, dürüstlük və ətraf mühit; Dayanıqlı satınalma; İnnovasiya və süni intellekt vasitəsilə dayanıqlılıq; və s.
“COP29-da iştirakımız “NEQSOL Holding”in dayanıqlı inkişafa və iqlim dəyişikliyi ilə mübarizəyə sadiqliyinin göstəricisidir. Hədəflərimiz istiqamətində holdinq və şirkətlərimiz tərəfindən müxtəlif böyük layihələr və işlər həyata keçirilir, həmçinin Nobel Energy-nin günəş enerjisi sahəsində layihələri, Audubon Companies tərəfindən təmiz enerji və karbon tutma texnologiyaları, Norm şirkətinin Net Zero Accelerator layihəsində iştirakı, telekommunikasiya qrupumuzun qlobal rəqəmsal kommunikasiya layihəsi və digər təşəbbüslər”, - “NEQSOL Holding”in Baş Direktoru Yusif Cabbarov qeyd edib.
“NEQSOL Holding” telekommunikasiya, enerji, tikinti və yüksək texnologiyalar sahəsində 11 ölkədə fəaliyyət göstərən beynəlxalq şirkətlər qrupudur.
