“Cənab Prezidentin bu xalqın haqqını heç kimə verməməsi çox adamı, çox dövləti narahat edir. Bunlardan biri də ABŞ-dır”.
Sfera.az xəbər verir ki, bunu Milli Məclisin bu gün keçirilən iclasında deputat Siyavuş Novruzov deyib.
O bildirib ki, son 50 ildə ABŞ dünyada baş verən müharibələrdə ya dolayısı yolla, ya da birbaşa iştirak edib: “Ölkələrdə səfirliklər yaradıb, ölkəni öz səfirləri vasitəsilə idarə etmək ABŞ-ın siyasətidir. Bu gün ərəb ölkələrində, başqa-başqa yerlərdə tökülən qanların səbəbkarı ABŞ-dır. Artıq ABŞ Cənubi Qafqaza da meyl etməyə başlayıb. Ancaq Azərbaycan hər zaman müstəqil siyasət yürüdüb, bundan sonra da yürüdəcək. ABŞ-ın əvvəlcə “Dağlıq Qarabağ”, indi isə birbaşa Ermənistana etdiyi yardımlar da buna görədir. ABŞ-ın Azərbaycanın içindəki dəstəkçiləri - Əli Kərimli və digərlərinin istəkləri baş tutmayacaq. Onlar Blinkenə müraciət edən 60 konqresmeni az qaldılar qəhrəman elan edələr".
Milli Məclis sədrinin birinci müavini Əli Əhmədov deyib ki, Azərbaycana qarşı sanksiya tətbiq etmək cəhdləri əvvəl də olub: “90-cı illərdə ABŞ-ın Azərbaycana qarşı tətbiq etdiyi 907-ci düzəliş buna misaldır. Amma bu, Azərbaycana mane olmadı. Azərbaycan gücləndi, qüvvətləndi, öz torpaqlarını işğaldan azad etdi. O vaxt 907-ci düzəliş Azərbaycana təsir etmədisə, indi öz torpaqlarını azad etmiş, güclü Azərbaycanı hər hansı sanksiya ilə yolundan döndürmək mümkün deyil. Azərbaycan bütün dövlətlərlə sülh içərisində fəaliyyət göstərmək modeli tətbiq edir. İnanıram ki, bu günə qədər Prezident İlham Əliyevin yürütdüyü siyasət qalib gəldiyi kimi, bundan sonra da qalib gələcək. Azərbaycanı hər hansı sanksiya ilə yolundan döndərmək mümkün deyil”.
Deputat Müşfiq Cəfərov bildirib ki, ABŞ uzun illər Azərbaycanı strateji tərəfdaş kimi gördüyünü bildirib, hətta NATO və müttəfiqləri Əfqanıstanda hərbi əməliyyatlar üçün Azərbaycandan tranzit kimi istifadə ediblər: “Lakin son 4 ildə Amerikada keçirilən dinləmələri, səsləndirilən çıxışları Azərbaycan və ABŞ arasında ikitərəfli və çoxtərəfli formatlarda olan münasibətlərə ciddi zərbə kimi qiymətləndirirəm.
Ağ evin Cənubi Qafqazla bağlı siyasətindəki əsas məqsəd Azərbaycanı regiondakı lider mövqeyindən çəkindirmək üçün dövlətimizə təzyiq etməkdir.
ABŞ Konqresi və Avropa parlamenti kimi beynəlxalq qurumların dövlətimizə qarşı aqressiyasının təməlindəki əsas səbəb Ermənistana olan sevgi deyil. Bütün beynəlxalq aləmə də məlumdur ki, hazırda regionumuz güc savaşının meydanına çevrilmək kimi ciddi bir təhlükəylə üz-üzədir. Çünki Avropa İttifaqı və ABŞ Azərbaycanla Ermənistan arasında sülh prosesindən daha çox, digər rəqiblərinin Qafqazdakı rolunun güclənməsindən narahatdır. Bu gün Cənubi Qafqazda mövqe savaşı gedirsə, bunun yeganə günahkarı Ermənistan rəhbərliyidir. Əgər bu dövlət prinsipal və milli maraqlarına arxalanan siyasət yürüdə bilsəydi regionda sülh və sabitlik bərqərar olardı. Bir sözlə, Mərkəzi Asiyaya getmək və qısa yol olaraq, Cənubi Qafqazdan istifadə etmək istəyən güclər sülhə və sabitliyə maneə olur. Bunun üçün də onlar hətta Azərbaycanın daxili işlərinə, digər dövlətlərlə olan münasibətlərinə belə qarışmaqdan çəkinmirlər. Azərbaycanın digər dövlətlərlə imzaladığı tərəfdaşlıq müqavilələri nə Avropa İttifaqı, nə də Ağ evin müzakirə obyekti ola bilməz. Bütün bunları da nəzərə alaraq, dövlətimizi qarşı tərəfi gücləndirib müdafiə etməklə hədələyən ABŞ-la olan sazişlərə xitam verilməsini istəyirik".
Milli Məclis sədrinin müavini Ziyafət Əsgərov deyib ki, ABŞ dövlət katibinin köməkçisi 2024-cü il oktyabrın əvvəlində ATƏT-in konfransında ABŞ-ın “Dağlıq Qarabağ”a yardımlarının davam etdiyi barədə bəyanat səsləndirib. Ziyafət Əsgərov bildirib ki, onun bu fikirləri Azərbaycanın ərazi bütövlüyünə hörmətsizlikdir: “Mən buradan onlara səslənirəm: Dağlıq Qarabağ anlayışı yoxdur, Qarabağ var. Bu açıqlamalar Azərbaycan-ABŞ münasibətlərinə kölgə salır. Ağ Ev rəsmilərinin Azərbaycan Prezidentinə Enerji həftəsində və digər tədbirlərdə ünvanlandığı məktublarda regionda sülhün bərqərar olmasında, sülh müqaviləsinin tezliklə imzalanmasında maraqlı olduğunu qeyd edirlər. İndi yürütdükləri siyasət isə onların ikiüzlülüyündən, ikili standartlardan xəbər verir. Niyə ABŞ ötən 30 ildə 1 milyondan artıq azərbaycanlı qaçqın və məcburi köçkünün haqlarını dünya ictimaiyyəti qarşısında qaldırmadı, niyə erməni qondarma rejiminin ləğvinə çağırışlar etmədi? Təəssüflər olsun ki, Azərbaycan bu gün erməni vandalizminin ağır nəticələri ilə üzləşir. Qarabağımız məhv edilib, milyonlarla minalar basdırılıb, ərazilərimiz yaşanmaz vəziyyətə salınıb. Torpaqlarımız azad olunandan sonra orada aparılan ekshumasiya işlərindən sonra soydaşlarımıza qarşı ermənilərin nə dərəcədə şiddət və təcavüz törətdiyi bir daha məlum olub. Azərbaycan əsassız təhdidləri qəbul etməyəcək, öz milli maraqlarına qarşı olan bütün çağırışları qətiyyətlə cavablandıracaq”.
