Müstəmləkəçilik problemi ilə üzləşən ölkələr ədalətin bərpası və müstəqilik qazanmaq uğrunda mübarizə aparmağa davam edir.
Visiontv.az APA-ya istinadən xəbər verir ki, bunu paytaxtda Bakı Təşəbbüs Qrupunun təşkilatçılığı ilə “Neokolonizalizm: İnsan Hüquqlarının Pozulması və Ədalətsizlik” adlı beynəlxalq konfransda Azərbaycan Respublikasının İnsan Hüquqları üzrə Müvəkkili (Ombudsman) Səbinə Əliyeva eyib.
O, beynəlxalq təşkilatları bu məsələ ilə bağlı qeyri-effektivlik göstərdikləri və ikili standartlar nümayiş etdirdikləri üçün qınayıb:
“İkili standartlardan əziyyət çəkən ölkələrdən biri də Azərbaycandır. Ermənistanın illər ərzində apardığı kəskin nifrət, etnik təmizləmə, terror və işğalçılıq siyasətindən azərbaycanlı mülki əhali əziyyət çəkib. Bizim ərazilərimizdə dini, tarixi, mədəni abidlər dağıdılıb, flora-fauna məhv edilib, ekosid, urbisid həyata keçirilib.
Ermənistanın əsassız ərazi iddiaları ilə başlatdığı müharibə nəticəsində 4000-ə yaxın vətəndaşımız itkin düşüb, onların taleyi hələ də məlum deyil”.
Ombudsman deyib ki, Ermənistan illər ərzində Qarabağ və Şərqi Zəngəzur bölgəsini işğal altında saxlamaqla kifayətlənməyib, insanların həyatına təhlükə yaymaq, onlar arasında itkilərə səbəb olmaq üçün bu ərazilər minalanıb:
“Bu minalar sakinlərimizin öz torpaqlarına təhlükəsiz qayıdışına, sürətli bərpa-tikinti işlərinə imkan vermir, insan itkilərinə səbəb olur. Ötən üç ildə mina qurbanların sayı 330-u keçib və onlar arasında mülki şəxslər üstünlük təşkil edir.
Biz ərazi bütövlüyümüzün bərpasına nail olduq, Azərbaycan BMT qətnamələrini təkbaşına yerinə yetirib, regionda sülh və sabitlik üçün real zəmin yaradıb. Lakin özünü demokratiyanın beşiyi hesab edən Fransa kimi ölkələr beynəlxalq hüququn prinsiplərinə hörmətsizlik edərək sülh və əmin-amanlıq mühitin yaradılmasına mane olmağa davam edir.
Hələ də dünyada müstəmləkə siyasəti ilə məşğul olan ölkələrin olması təəssüf doğurur. Bu ölkələr, öz vətəndaşlarının fundamental hüquqlarını pozanlar özlərini beynəlxalq hüququn müdafiəçiləri kimi təqdim edirlər”,
O əlavə edib ki, Afrika ölkələrində ağır cinayətlər, dəhşətli qırğınlar törədilib:
“Təkcə Əlcəzairdə ötən əsrdə baş verənlər bunu sübut edir. Ermənistanın etnik nifrət, terror siyasətini açıq şəkildə dəstəkləməklə son zamanlar Fransa ölkəmiz əleyhinə siyasətini gücləndirib. Bu siyasət ədalətli sülhün bərqərar olmasına deyil, iki qonşu xalq arasında düşmənçiliyin gücləndirilməsinə xidmət edir. Fransanın etdikləri Cənubi Qafqazda dayanıqlı sülhə xidmət etmir”.
O, BMT-də ciddi islahatların həyata keçirilməsi və təşkilatın fəaliyyətinin təkmilləşdirilməsinin vacib olduğunu da vurğulayıb.
