Suriyanın müxalif Milli Ordusu mənsubları və "Təhrir əş-Şam" hərəkatı Bəşər Əsədə qarşı genişmiqyaslı əməliyyat başladıb.
Bakupost.az xarici KİV-ə istinadən xəbər verir ki, baş verən toqquşmalardan sonra müxaliflər Hələbə 4 kilometrə qədər yaxınlaşıb.
Müxalif mənbələr əməliyyat çərçivəsində 32 kənd və qəsəbənin rejim qüvvələrindən alındığını açıqlayıb. Əldə edilən ərazilər arasında strateji əhəmiyyətə malik Urm əl-Suğra və Ancara kimi qəsəbələr, həmçinin Hələbin Qərbində yerləşən Əsəd rejiminin ən böyük bazası olan 46-cı baza da yer alır. Bundan əlavə, M5 avtomagistralının bir hissəsinə nəzarət edildiyi də qeyd olunub.
"Təhrir əş-Şam" Hələb şəhər mərkəzinə yaxınlaşarkən, gün ərzində davam edən döyüşlər nəticəsində, təxminən, 250 kvadrat kilometr ərazi də nəzarət altına alınıb. Nəzarət edilən bəzi yerlərdə Əsədin şəkilləri endirilib.
"Təhrir əş-Şam" əldə etdiyi ərazilərdə rejimə məxsus hərbi texnika və silahları ələ keçirib, rejimin çox sayda əsgərini əsir alıb. Döyüşlərdən qaçan çoxlu sayda mülki vətəndaş İdlibin kənd ərazilərinə sığınıb.
Rəhman Mirzəlizadə, Bakupost
