“İnter Mayami”nin argentinalı ulduz hücumçusu və kapitanı Lionel Messi karyerasında onu ən çox hiddətləndirmiş futbolçudan söhbət açıb.
Arena.az “Give me Sport” dərgisinə istinadən, argentinalı ulduzun bu barədə fikrini təqdim edir:
“Serxio Ramosla çox toqquşmamız olub, neçə dəfə mübahisə də etmişəm… Ramos məni ən çox qəzəbləndirmiş futbolçudur. Bəli, biz komanda yoldaşı olmuşuq, amma əvvəllər “El-Klasiko”da həmişə bir-birimizə rəqib olurduq. Gərgin oyunlarımız olub”, deyə “Leo” xatırlayıb.
Xatırladaq ki, Messi “Barselona”da, ispan mərkəz müdafiəçisi Serxio Ramos isə “Real”da çıxış edərkən, rəqiblərin başa-baş oyunlarında futbolçular daim gərginlik yaşayıblar. Sonradan hər iki futbolçu iki mövsüm birlikdə Fransa nəhəngi PSJ-nin uğurları üçün çalışıb.
Lionel Messi 2023-cü ilin yayından MLS təmsilçisi “İnter Mayami”nin heyətində çıxış edir. Argentinalı ulduz amerikan klubuna PSJ-dən azad agent qismində qoşulub. “Leo”nun “İnter Mayami” ilə müddəti 2025-ci ilin dekabr ayının sonuna qədər qüvvədə olacaq müqaviləsi var.
Argentinalı ulduz cari mövsümdə “İnter Mayami”nin heyətində bütün yarışlarda 25 oyuna çıxıb, 23 qol vurub və 13 məhsuldar ötürmə verib.
Təcrübəli ulduzun “İnter Mayami” karyerası ümumilikdə 39 oyun, 34 qol və 18 məhsuldar ötürmədən ibarətdir. Messi “vağlar”ın tarixinin ən sərrast qoçusudur.
Ulduz hücumçu ötən il Mayami təmsilçisi ilə Liqalar kubokunu qazanıb. Bu mövsümdə isə Messi “İnter Mayami”nin heyətində MLS-in Şərq Konfransının qalibi olub. Müvafiq qənimət “Leo”nun futbolçu karyerası ərzində qazandığı 46-cı qənimətdir. Əlavə edək ki, Messi futbol tarixində ən çox qənimət qazanmış oyunçudur.
“Leo” hazırda kapitanı olduğu Argentina yığmasında 2005-ci il avqustun 17-də debüt edib. Ulduz hücumçu yığmada 191 oyun keçirib, 112 qol vurub və 61 məhsuldar ötürmə verib. Bu göstəricilər üzrə “Leo” yığmanın mütləq rekordçusudur.
Argentinalı superulduz Argentina yığması ilə Yay Olimpiya Oyunlarının (2008), Amerika Kubokunun (2021, 2024), FIFA Dünya Kubokunun (2022), Çempionların CONMEBOL-UEFA Kubokunun (2022) qalibi olub. Həmçinin Messi dünya çempionatının (2014) və Amerika Kubokunun gümüş (2007, 2015, 2016) mükafatçısı olub.
“Leo”nun qənimətlər muzeyində müxtəlif fərdi mükafatlar, həmçinin 8 “Qızıl top”u var.
