Argentina millisinin sabiq hücumçusu Serxio Aquero həmyerlisi Lionel Messinin klublararası dünya çempionatında mümkün iştirakından danışıb.
Arena.az xatırladır ki, Messinin formasını geyindiyi “İnter Mayami” gələn il Amerika Birləşmiş Ştatlarında (ABŞ) keçiriləcək FIFA Klub Dünya Kubokunda iştirak hüququ qazanıb.
Lionel Messinin də “İnter Mayami”nin heyətində qarşıdakı 2025-ci il klublararası dünya çempionatında çıxış etməsi gözlənilir. Aqueronun bu barədə fikirlərinə diqqət yetirək:
“Biz bilirik ki, Messi hər kəsin görmək istədiyi oyunçulardan biridir, buna görə də “İnter Mayami”nin xüsusən də heyətində Leo ilə bu yarışda oynaması çox gözəl olacaq, O, uduzmağı sevmədiyi üçün mütləq səy göstərmək istəyəcək”, deyə Aquero vurğulayıb.
Lionel Messi 2023-cü ilin yayından MLS təmsilçisi “İnter Mayami”nin heyətində çıxış edir. Argentinalı ulduz amerikan klubuna PSJ-dən azad agent qismində qoşulub. “Leo”nun “İnter Mayami” ilə müddəti 2025-ci ilin dekabr ayının sonuna qədər qüvvədə olacaq müqaviləsi var.
Argentinalı ulduz son mövsümdə “İnter Mayami”nin heyətində bütün yarışlarda 25 oyuna çıxıb, 23 qol vurub və 13 məhsuldar ötürmə verib.
Təcrübəli ulduzun “İnter Mayami” karyerası ümumilikdə 39 oyun, 34 qol və 18 məhsuldar ötürmədən ibarətdir. Messi “vağlar”ın tarixinin ən sərrast qoçusudur.
Ulduz hücumçu ötən il Mayami təmsilçisi ilə Liqalar kubokunu qazanıb. Bu mövsümdə isə Messi “İnter Mayami”nin heyətində MLS-in Şərq Konfransının qalibi olub. Müvafiq qənimət “Leo”nun futbolçu karyerası ərzində qazandığı 46-cı qənimətdir. Əlavə edək ki, Messi futbol tarixində ən çox qənimət qazanmış oyunçudur.
“Leo” hazırda kapitanı olduğu Argentina yığmasında 2005-ci il avqustun 17-də debüt edib. Ulduz hücumçu yığmada 191 oyun keçirib, 112 qol vurub və 61 məhsuldar ötürmə verib. Bu göstəricilər üzrə “Leo” yığmanın mütləq rekordçusudur.
Argentinalı superulduz Argentina yığması ilə Yay Olimpiya Oyunlarının (2008), Amerika Kubokunun (2021, 2024), FIFA Dünya Kubokunun (2022), Çempionların CONMEBOL-UEFA Kubokunun (2022) qalibi olub. Həmçinin Messi dünya çempionatının (2014) və Amerika Kubokunun gümüş (2007, 2015, 2016) mükafatçısı olub.
“Leo”nun qənimətlər muzeyində müxtəlif fərdi mükafatlar, həmçinin 8 “Qızıl top”u var.
