MLS-in komissarı Don Qarber “İnter Mayami”nin argentinalı ulduz hücumçusu və kapitanı Lionel Messinin məşhurluq səviyyəsindən söhbət açıb.
Arena.az “The Independent” nəşrinə istinadən, Qarberin bu barədə fikrini təqdim edir:
“Əgər siz dünyəvi futbol aləmində yaşamırsınızsa, “Leo” Messinin çoxyönlü cazibəsini, böyük məşhurluğunu və ulduzluğunu təsəvvür etmək sizin üçün çətindir. Demək istədiyim odur ki, o, Maykl Cekson və Teylor Sviftin birgə təcəssümüdür və o, bizim liqamızda oynayır. Deyim ki, bu, gözləntilərimi üstələyib. Ümidvaram ki, “Leo” sağlam qalacaq və hələ uzun müddət bizim liqamızda olacaq. İstərdim ki, “Leo” sona qədər liqamızın bir parçası olaraq qalsın”, deyə Don Qarber vurğulayıb.
Lionel Messi 2023-cü ilin yayından MLS təmsilçisi “İnter Mayami”nin heyətində çıxış edir. Argentinalı ulduz amerikan klubuna PSJ-dən azad agent qismində qoşulub. “Leo”nun “İnter Mayami” ilə müddəti 2025-ci ilin dekabr ayının sonuna qədər qüvvədə olacaq müqaviləsi var.
Argentinalı ulduz cari mövsümdə “İnter Mayami”nin heyətində bütün yarışlarda 25 oyuna çıxıb, 23 qol vurub və 13 məhsuldar ötürmə verib.
Təcrübəli ulduzun “İnter Mayami” karyerası ümumilikdə 39 oyun, 34 qol və 18 məhsuldar ötürmədən ibarətdir. Messi “vağlar”ın tarixinin ən sərrast qoçusudur.
Ulduz hücumçu ötən il Mayami təmsilçisi ilə Liqalar kubokunu qazanıb. Bu mövsümdə isə Messi “İnter Mayami”nin heyətində MLS-in Şərq Konfransının qalibi olub. Müvafiq qənimət “Leo”nun futbolçu karyerası ərzində qazandığı 46-cı qənimətdir. Əlavə edək ki, Messi futbol tarixində ən çox qənimət qazanmış oyunçudur.
“Leo” hazırda kapitanı olduğu Argentina yığmasında 2005-ci il avqustun 17-də debüt edib. Ulduz hücumçu yığmada 191 oyun keçirib, 112 qol vurub və 61 məhsuldar ötürmə verib. Bu göstəricilər üzrə “Leo” yığmanın mütləq rekordçusudur.
Argentinalı superulduz Argentina yığması ilə Yay Olimpiya Oyunlarının (2008), Amerika Kubokunun (2021, 2024), FIFA Dünya Kubokunun (2022), Çempionların CONMEBOL-UEFA Kubokunun (2022) qalibi olub. Həmçinin Messi dünya çempionatının (2014) və Amerika Kubokunun gümüş (2007, 2015, 2016) mükafatçısı olub.
“Leo”nun qənimətlər muzeyində müxtəlif fərdi mükafatlar, həmçinin 8 “Qızıl top”u var.
