“İnter Mayami”nin argentinalı ulduzu Lionel Messi yanvarın 4-də ABŞ prezinti Co Baydenin iştirakı ilə keçirilmiş mərasimə qatılmayıb.
Arena.az məlumat verir ki, söhbət Co Bayden tərəfindən argentinalı ulduza təqdim edilməsi nəzərdə tutulmuş Prezident Azadlıq Medalının təqdimat mərasimindən gedir.
Bu medal, “Amerika Birləşmiş Ştatlarının çiçəklənməsinə, dünya sülhünə və ya digər əhəmiyyətli ictimai, dövlət və ya özəl səylərə görkəmli töhfələr vermiş” şəxslərə təqdim edilən, ölkənin ən yüksək dərəcəli mülki mükafatıdır.
“Globo” dərgisinin məlumatına görə, Lionel Messinin yoxluğu əvvəlcədən məlum olub və mərasim zamanı argentinalı ulduzun adı açıqlanmayıb. Həmçinin Messi nüfuzlu dövlət mükafatını qəbul etməyə səlahiyyətli nümayəndəsini də göndərməyib.
“Bu, böyük bir imtiyazdır”
“Leo” mərasimində iştirak etməyəcəyinə əvvəlcədən aydınlıq gətirib:
“Mən bu mükafata layiq görülməkdən qürur duyuram. Bu, böyük bir imtiyazdır və mən buna görə dərin minnətdarlığımı bildirirəm. Təəssüf ki, mənim əvvəlcədən öhdəliyim var və yanvarın 4-də Ağ Evdə keçiriləcək mərasimdə iştirak edə bilməyəcəm. Bununla belə, bilmənizi istəyirəm ki, mən müvafiq addımı səmimi qəlbdən qiymətləndirirəm”, – “Marca” nəşri Messinin tədbir təşkilatçılarına yazdığı məktubundan sitat gətirir.
Lionel Messi 2023-cü ilin yayından MLS təmsilçisi “İnter Mayami”də çıxış edir. Argentinalı ulduz amerikan klubuna PSJ-dən azad agent qismində qoşulub. “Leo”nun “İnter Mayami” ilə müddəti 2025-ci ilin dekabr ayının sonuna qədər qüvvədə olacaq müqaviləsi var.
Argentinalı ulduzun “İnter Mayami” karyerası ümumilikdə 39 oyun, 34 qol və 18 məhsuldar ötürmədən ibarətdir. Messi “vağlar”ın tarixinin ən sərrast qoçusudur.
Ulduz hücumçu ötən il Mayami təmsilçisi ilə Liqalar kubokunu qazanıb. Bu mövsümdə isə Messi “İnter Mayami”nin heyətində MLS-in Şərq Konfransının qalibi olub. Müvafiq qənimət “Leo”nun futbolçu karyerası ərzində qazandığı 46-cı qənimətdir. Əlavə edək ki, Messi futbol tarixində ən çox qənimət qazanmış oyunçudur.
“Leo” hazırda kapitanı olduğu Argentina yığmasında 2005-ci il avqustun 17-də debüt edib. Ulduz hücumçu yığmada 191 oyun keçirib, 112 qol vurub və 61 məhsuldar ötürmə verib. Bu göstəricilər üzrə “Leo” yığmanın mütləq rekordçusudur.
Argentinalı superulduz Argentina yığması ilə Yay Olimpiya Oyunlarının (2008), Amerika Kubokunun (2021, 2024), FIFA Dünya Kubokunun (2022), Çempionların CONMEBOL-UEFA Kubokunun (2022) qalibi olub. Həmçinin Messi dünya çempionatının (2014) və Amerika Kubokunun gümüş (2007, 2015, 2016) mükafatçısı olub.
“Leo”nun qənimətlər muzeyində müxtəlif fərdi mükafatlar, həmçinin 8 “Qızıl top”u var.
