Futbol üzrə Azərbaycan millisinin hücumçusu Mahir Emreli bu gün Almaniyanın “Nürnberq” komandasının heyətində növbəti matçına çıxıb.
Arena.az xəbər verir ki, 27 yaşlı futbolçu Almaniya Kubokunun 1/16 final mərhələsi çərçivəsində baş tutan “Hoffenhaym”la matçın iştirakçısı olub.
Nürnberqlilər Bundesliqa təmsilçisinin meydanında baş tutan bu oyunda 1:2 hesablı məğlubiyyətə üzülüblər. Nəticədə Mahirin komandası Almaniya Kuboku ilə vidalaşıb.
Mahir bu dəfə də start heyətdə meydana çıxıb və 81-ci dəqiqədə, hesab 1:2 olarkən əvəzlənib. Komandasının yeganə qolunu da məhz Mahir vurub. O, 48-cü dəqiqədə fərqlənməklə hesabı 1:1 edib.
Bu, Mahirin “Nürnberq”in heyətində meydana çıxdığı ardıcıl 3-cü oyunda 3-cü qoludur. O, daha öncə Almaniya 2-ci Bundesliqası çərçivəsində keçirdikləri oyunlarda da fərqlənmişdi. Söhbət “Qroyter Fürt” və “Yan Regensburq”la oyunlardan gedir.
“Nürnberq” növbəti matçını noyabrın 3-də səfərdə 2-ci Bundesliqa çərçivəsində qarşılaşacağı “Hamburq”a qarşı keçirəcək. Mahirin komandası bu yarışda 10 oyuna topladığı 16 xalla hazırda 18 iştirakçı arasında 6-cı pillədə qərarlaşıb. Baş məşqçisi Miroslav Kloze olan komanda bu mövsüm 5 qələbə qazandığı halda 1 heç-heçə edib, 4 oyunda məğlubiyyətə üzülüb.
Mahir Emreli bu il avqustun 6-da “Nürnberq”lə 1 illik müqavilə imzalayıb. Onun sözləşməsinin müddəti mövsümün sonunda artırıla bilər. Azərbaycanlı futbolçu Almaniya klubunun heyətində 6 rəsmi matça çıxıb, 3 qol vurub.
“Bakı”nın yetirməsi olan Mahir Emreli karyerası ərzində “Qarabağ”, “Legiya” (Polşa), “Konyaspor” (Türkiyə) və “Dinamo” (Zaqreb, Xorvatiya) klublarında da forma geyinib. Hücumçu Azərbaycan milli komandasının heyətində meydana çıxdığı 48 oyunda 5 qol vurub.
Sonda Almaniya Kubokunun 1/16 final mərhələsi çərçivəsində baş tutmuş oyunların bütün nəticələrini təqdim edirik:
Almaniya Kuboku
1/16 final
Auqsburq – Şalke 3:0
Bayer – Elversberq 3:0
Kikers Offenbax – Karlsrue 0:2
Leypsiq – Sankt Pauli 4:2
Köln – Holştayn 3:0
Yan Regensburq – Qroyter Furt 1:0
Ştutqart – Kayserslautern 2:1
Volfsburq – Borussiya (Dortmund) 1:0
Ayntraxt – Borussiya (Mönhenqladbax) 2:1
Frayburq – Hamburq 2:1
Herta – Haydenhaym 2:1
Paderborn – Verder 0:1
Arminiya (Bilefeld) – Union Berlin 2:0
Hoffenhaym – Nürnberq 2:1
Maynts – Beyern 0:4
Dinamo (Drezden) – Darmstadt 2:3
