Təyyarə qəzasında Qusardan bacı-qardaş daHƏLAK OLUB

Təyyarə qəzasında iki Qusar sakininin də öldüyü məlum olub.

Qusar RİH başçısının birinci müavini Şahid Fərəməzovun Bizim.Media-ya verdiyi məlumata görə, təyyarə qəzasında Qusarın Suduroba kənd sakinləri, bacı-qardaş, 22 yaşlı Əli Mirzəbəy oğlu və 19 yaşlı Xədicə Mirzəbəy qızı Əlimirzəyevlər də həlak olublar.

Qeyd edək ki, ötən gün Bakı-Qroznı marşrutu üzrə uçan "Embraer 190" sərnişin təyyarəsi Aktaunun hava limanından 3 km məsafədə qəzaya uğrayıb.

Aktau şəhərində qəzaya uğrayan Bakı-Qroznı reysini yerinə yetirən “Embraer 190” təyyarəsində 62 sərnişin, 5 ekipaj üzvü olmaqla, ümumilikdə 67 nəfər olub.

Son məlumatlara əsasən, sərnişinlər arasında 37 Azərbaycan vətəndaşı olub, onlardan 23-ü həlak olub, 14-ü sağ qalıb. Qırğızıstandan 3 nəfər olub, onlar sağ qalıblar. Eyni zamanda, 16 Rusiya vətəndaşı olub, onlardan 7-si ölüb, 9-u sağ qalıb. Qazaxıstandan 6 sərnişin olub, onlar həlak olublar. 

Aytəkin Alxaslı, Bizim.Media, Şimal bürosu

• Həlak
• Təyyarə Qəzası
• Qusar
• Bacı-Qardaş
• Embraer 190