Bu gün keçirilmiş bir oyunla Azərbaycan Basketbol Liqasında (ABL) 2024/2025-ci illər mövsümünün 9-cu turuna start verilib.
Arena.az xəbər verir ki, ilk oyun günündə bir qarşılaşma baş tutub.
Günün yeganə qarşılaşması Bakıda baş tutub. A qrupunun autsayderi NTD lider “Sabah”a 67:94 hesabı ilə uduzub. “Sabah” bu qələbə sayəsində 17 xalla A qrupunda liderliyini qoruyub. NTD 10 xalla sonuncu – altıncı pillədə qərarlaşıb.
Qeyd edək ki, 9-cu tura dekabrın 27-də yekun vurulacaq.
Azərbaycan Basketbol Liqası
A qrupu, 9-cu tur
24 dekabr
NTD – Sabah 67:94 (10:20, 20:22, 19:25, 19:27)
Bakı. “Sərhədçi” İdman Mərkəzi.
Xallar: Sabah – 17. Naxçıvan – 14. Sərhədçi – 12. Abşeron – 12. Neftçi – 10. NTD – 10.
Qeyd edək ki, cari mövsümün reqlamentə əsasən, çempionatın oyunları dörd dövrəli 20 turdan ibarət sistem üzrə keçiriləcək. Müntəzəm mövsümdə A qrupunu ilk 3 sırada tamamlamış klublarla B qrupunu lider bitirmiş komanda pley-offun 1/4 final mərhələsinə vəsiqə qazanacaqlar. A və B qruplarında digər yerləri tutmuş komandalar isə pley-offun 1/8 final mərhələsində üz-üzə gələcəklər. 1/8 finalda ən tez iki qələbə qazanmış klublar 1/4 finala vəsiqə qazanacaqlar. Həm 1/4 final, həm də yarımfinal seriyaları 2 qələbəyə qədər davam edəcək. Final seriyasında isə ən tez 4 qələbə qazanmış komanda Azərbaycan Basketbol Liqasının çempionu olacaq.
Klubların pley-off mərhələsində göstərdikləri uğurlu və ya uğursuz nəticələrə əsasən, növbəti mövsümdən hansı klubların A qrupunda, hansı klubların isə B qrupunda iştirak edəcəyi müəyyənləşəcək.
